कोरोना विरुद्ध खोपको दोस्रो मात्रा आज २७ जिल्लामा लगाइँदै
_1637563054.jpg)
देशका २७ जिल्लाका पाँच वर्षदेखि १२ वर्षमुनिका बालबालिकाकालाई कोरोना भाइरस विरुद्धको खोपको दोस्रो मात्रा आज लगाइँदै छ।
स्वास्थ्य तथा जनसङ्ख्या मन्त्रालयले गत असार ९ गतेदेखि १५ गतेसम्म खोप लगाएका बालबालिकालाई आजदेखि दोस्रो मात्रा लगाउन थालेको हो। ती जिल्लाका बालबालिकालाई खोप लगाउन विद्यालयमा नै खोप केन्द्र स्थापना गरिएको छ। उनीहरूलाई कोरोना भाइरस विरुद्धको ‘फाइजर बायोएनटेक’ खोप लगाउन थालेको हो।
दोस्रो मात्रा लगाउन पहिलो मात्रा लगाएको खोप कार्ड बोकेर जान भनिएको छ। पहिलो मात्रा २१ लाख बालबालिकालाई लगाइएको थियो। स्वास्थ्य सेवा विभागका महानिर्देशक डा. दीपेन्द्ररमण सिंहले खोपको प्रभावकारिता ९१ प्रतिशत र सुरक्षित रहेकाले सबै बालबालिकालाई खोप लगाउन आग्रह गरे।
ती जिल्लामा प्रदेश १ का झापा, इलाम, सुनसरी र मोरङ, मधेश प्रदेशको सप्तरी, सिराहा, धनुषा, महोत्तरी र पर्सा, बागमती प्रदेशका मकवानपुर, सिन्धुली, चितवन, काभ्रेपलाञ्चोक, काठमाडौं, भक्तपुर र ललितपुर छन्।
यस्तै गण्डकी प्रदेशका कास्की र नवलपरासी पूर्व, लुम्बिनी प्रदेशका नवलपरासी पश्चिम, रुपन्देही, दाङ, बाँके र बर्दिया, कर्णाली प्रदेशको सुर्खेत र सुदूरपश्चिम प्रदेशको कैलाली, कञ्चनपुर र डडेल्धुराका बालबालिकालाई पनि कोरोना भाइरस विरुद्धको खोप लगाइँदै छ । खोप अभियान यही साउन ८ गतेसम्म सञ्चालन हुनेछ।
यस्तै, दोस्रो चरणमा ५० जिल्लामा आगामी भदौ ५ देखि ११ गतेसम्म खोप लगाइनेछ। सोही समूहलाई दोस्रो मात्रा भदौ २७ देखि असोज १ गतेसम्म सञ्चालन गरिनेछ। -रासस
-1732180391.jpg)
-1732099242.jpg)
-1732097316.jpg)
