महिलाको हत्या आरोपमा श्रीमान् र ससुरा पक्राउ
एक महिलाको हत्या गरेको आरोपमा उनका श्रीमान् र ससुरालाई पक्राउ परेका छन्। धनुषाको शहीदनगर नगरपालिका–८ नाथपट्टीकी गौरीदेवी मण्डलको हत्या गरेको आरोपमा उनका श्रीमान् रामचन्द्र मण्डल खत्वे र ससुरा सहदेव मण्डल खत्वेलाई प्रहरीले पक्राउ गरेको हो।
रामचन्द्र र सहदेवले गौरीदेवीको घाँटी थिचेर हत्या गरेको भन्दै गौरीकी आमा सिरहाको गोलबजार नगरपालिका–५ की तेतरीदेवी मण्डलले २०७८ कात्तिकमा इलाका प्रहरी कार्यालय यदुकाहामा किटानी जाहेरी दिएकी थिइन्। सोही जाहेरीका आधारमा दुवै जनालाई भारतको लदनियाबाट पक्राउ गरी नेपाल ल्याइएको जिल्ला प्रहरी कार्यालय धनुषाका प्रवक्ता प्रहरी नायब उपरीक्षक प्रदीपबहादुर क्षेत्रीले जानकारी दिए।
पक्राउ परेका दुवै जनामाथि कर्तव्य ज्यान अभियोगमा मुद्दा दर्ता गरी धनुषा जिल्ला अदालतबाट पाँच दिनको म्याद थप गरिएको छ। घटनाबारे अनुसन्धान भइरहेको प्रहरी नायब उपरीक्षक क्षेत्रीले बताए।
-1732353496.jpg)
