दाहालले मेयर साहलाई भने- तपाईंको जित ठूलो क्रान्ति हो
नेकपा (माओवादी केन्द्र)का अध्यक्ष पुष्पकमल दाहालले काठमाडौंको मेयरमा स्वतन्त्र उम्मेदवार बालेन्द्र साहको जितलाई ठूलो क्रान्ति भनेका छन्।
शनिबार मेयर साहसँगको भेटमा अध्यक्ष दाहालले उनको प्रशंसा गरेका हुन्। दाहाललाई भेट्न मेयर साह खुमलटार पुगेका थिए।
मेयर साहसँगको भेटमा अध्यक्ष दाहालले भने, “तपाईंको जित बहुत ठूलो कुरा हो, क्रान्ति हो।”
सबैसँग मिलेर काम गर्न खोजेकोमा अध्यक्ष दाहालले मेयर साहको प्रशंसा गरेका हुन्। उनले मेयर साहलाई भने, “पहिलेका मेयरहरू, स्वतन्त्रहरू कुनै एउटा पार्टीसँग अलाइन भएर अरू पार्टीलाई गाली गर्ने सिस्टम थियो, तर तपाईंले पहिलो पटक सबैलाई मिलाएर सहकार्य गर्ने काम गरिरहनुभएको छ, त्यो सराहनीय छ।”
खुमलटारमा भएकाे भेटमा माओवादी अध्यक्ष दाहालले मेयर साहलाई आफ्नो पार्टीको साथ र सहयोग रहने बताए।
काठमाडौंको मेयरमा निर्वाचित भएपछि साह विभिन्न दलका शीर्ष नेतासँग भेटघाट गरिरहेका छन्। यसअघि उनले प्रधानमन्त्री एवं कांग्रेस सभापति शेरबहादुर देउवा, नेकपा (एमाले) अध्यक्ष केपी शर्मा ओली, शहरी विकास मन्त्री रामकुमारी झाक्रीसँग भेटघाट गरेका थिए।
-1734523992.JPG)