स्थानीय चुनावः १२ बजेसम्म ३५ प्रतिशत मतदान
स्थानीय तहको निर्वाचनमा शुक्रबार मध्याह्न १२ बजेसम्म देशभर ३५ प्रतिशत मतदान भएको निर्वाचन आयोगले जनाएको छ।
आयोगलाई प्राप्त प्रारम्भिक तथ्याङ्क अनुसार, ३५ प्रतिशत मतदान भएको प्रवक्ता शालिग्राम शर्मा पौडेलले जानकारी दिए। उनका अनुसार, केही स्थानमा छिटफुट घटना बाहेक शान्तिपूर्ण रूपमा मतदान भइरहेको छ।
देशका ७५३ वटै स्थानीय तहका १० हजार ७५६ मतदान स्थलका २१ हजार ९५५ मतदान केन्द्रमा बिहान ७ बजेदेखि नै मतदान शुरू भएको आयोगले जनाएको छ।
दोलखा, सर्लाही, सप्तरी, रामेछाप, पर्वत, हुम्ला र बाजुराका केही स्थानमा सामान्य विवादका कारण मतदान कार्य अवरुद्ध भएको थियो। अहिले ती स्थानमा पनि मतदान चलिरहेको आयोगका प्रवक्ता पौडेलले बताए।
-1732353496.jpg)
