आज स्थानीय चुनाव, देशभर मतदान शुरू
स्थानीय सरकार गठनका लागि आज बिहान ७ बजेदेखि देशभर मतदान शुरू भएको छ।
देशभर शान्तिपूर्ण रूपमा मतदान शुरू भएको निर्वाचन आयोगले जनाएको छ। आज बिहान ७ बजेदेखि शुरू भएको मतदान साँझ ५ बजेसम्म चल्नेछ।
स्थानीय तहका जनप्रतिनिधि चयन गर्न बिहानैदेखि मतदान केन्द्रमा मतदाताको लाइन लागेको छ। विशेष गरेर तराई क्षेत्रका मतदान केन्द्रमा झिसमिसेदेखि नै मतदाता लाइनमा लागेका छन्।
आज देशभरका ७५३ स्थानीय तहमा मतदान शुरू भएको हो। जसमा ६ महानगरपालिका, ११ उपमहानगरपालिका, २७६ नगरपालिका र ४६० गाउँपालिका छन्।
देशभरबाट ३५ हजार २२१ जनप्रतिनिधि चयन हुनेछन्। जसमा ३५५ जना निर्विरोध भइसकेका छन्।
आज कपिलवस्तुको महाराजगञ्ज नगरपालिका र दाङको तुलसीपुर उपमहानगरपालिका-१७ मा मात्रै मतदान रोकिएको छ। त्यहाँ उम्मेदवारको मृत्यु भएका कारण जेठ ३ गते निर्वाचन हुनेछ।
-1732353496.jpg)
