प्रधानमन्त्री देउवा र भारतीय प्रधानमन्त्री मोदीबीच भेटवार्ता
भारत भ्रमणमा रहेका प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीबीच भेटवार्ता भएको छ।
नयाँ दिल्लीस्थित हैदरावाद हाउसमा देउवा र मोदीबीच भेटवार्ता भएको हो। भेटवार्तामा द्विपक्षीय हितका विषयमा छलफल भएको प्रधानमन्त्रीको सचिवालयले जनाएको छ।
भारतीय प्रधानमन्त्री मोदीको निमन्त्रणमा प्रधानमन्त्री देउवा तीनदिने औपचारिक भ्रमणमा छन्। आजै दुवै प्रधानमन्त्रीबीच एक्लाएक्लै भेटवार्ता हुने कार्यक्रम रहेको छ।
प्रधानमन्त्री देउवाले आज अपराह्न ४ः३० बजे भारतका उपराष्ट्रपति वेन्कैया नायडूसँग भेटवार्ता गर्ने कार्यक्रम छ। यससँगै प्रधानमन्त्री देउवाले आजै साँझ भारतीय व्यापारिक समुदायसँग अन्तरक्रिया गर्ने भएका छन्।
यसअघि शनिबार बिहान प्रधानमन्त्री देउवाले राजघाटस्थित महात्मा गान्धीको समाधिस्थल पुगेर श्रद्धाञ्जली अर्पण गरेका थिए। त्यहाँ राखिएको आगन्तुक पुस्तिकामा अहिंसात्मक आन्दोलनका प्रणेता गान्धीको ‘भारत छोडो’ अभियान तथा गान्धीको योगदान अविस्मरणीय रहेको उल्लेख गर्दै हस्ताक्षर गरेका थिए।
-1732180391.jpg)
-1732099242.jpg)
