नयाँ वर्षमा दरबारमार्ग महोत्सव
नयाँ वर्षको अवसरमा काठमाडौंको दरबारमार्गमा दरबारमार्ग महोत्सव आयोजना गरिने भएको छ।
एनसेलसँगको सहकार्यमा नेपाल उद्योग वाणिज्य महासंघ, महासंघको सदस्य रेस्टुरेन्ट एन्ड बार एसोसिएशन नेपाल (रेबान) र दरबारमार्ग विकास बोर्डले ३ वैशाखमा १५औं दरबारमार्ग महोत्सव आयोजना गर्न लागेको हो। महोत्सवको सहप्रायोजक गोरखा ब्रुअरी रहेको छ।
यस पटकको महोत्सवमा ‘स्थानीय उत्पादन तथा आन्तरिक पर्यटन प्रवर्द्धन’ भन्ने नारा दिइएको छ। आन्तरिक पर्यटनलाई प्रवर्द्धन गरी देशको पर्यटन विकासमा टेवा पुर्याउने र नेपाली उत्पादन, नेपाली परिकार र नेपाली संस्कृतिको प्रवर्द्धन गर्ने उद्देश्यले महोत्सव आयोजना गर्न लागेको जनाइएको छ।
महोत्सवमा सातै प्रदेशको संस्कृति झल्कने विभिन्न जातजातिका कला संस्कृतिहरूको प्रस्तुति गरिने भएको छ। दरबारमार्गको दक्षिण क्षेत्रको महेन्द्र शालिकसम्म र उत्तरतर्फ नारायणहिटी सङ्ग्रहालयको गेटको ट्राफिक पोलसम्मको क्षेत्रमा महोत्सव सञ्चालन हुनेछ।
-1732180391.jpg)
-1732099242.jpg)
