जीप दुर्घटनामा तीन जनाको मृत्यु, तीन सम्पर्कविहीन
पोखराबाट रसुवाको गोल्जुङतर्फ जाँदै गरेको टाटासुमो मैलुङ–स्याँफ्रुबेँशी सडकखण्डमा दुर्घटनामा तीन जनाको मृत्यु भएको छ ।
बा १० च ५८२० नं को टाटासमुमो गएराती कालिका र गोशाइँकुण्ड गाउँपालिकाको सीमाबाट त्रिशुली नदीमा खस्दा अरु तीन जना वेपत्ता छन् भने पाँच गम्भीर घाइते छन् ।
मृत्यु हुनेमा आमाछोदिङ्मो गाउँपालिका–४ का ३२ वर्षीय नोर्वु तामाङ, ३२ वर्षीया साइली घले र ३५ वर्षीया मिन्दो घले रहेको जिल्ला प्रहरी कार्यालयका प्रहरी निरीक्षक ईश्वरीप्रसाद भण्डारीले जानकारी दिए ।
उनका अनुसार दुई जनाको घटनास्थलमा तथा एक जनाको त्रिशुली अस्पतालमा उपचारका क्रममा मृत्यु भएको हो ।
टाटासुमोमा सवार सवै उत्तरी रसुवाको गोल्जुङका बासिन्दा हुन् । गम्भीर घाइतेमा चालक आमाछोदिङ्मो गाउँपालिका–४ का ३२ वर्षीय निमा तामाङ, ३५ वर्षीया जौरानी घले, २९ वर्षीय योङजुङ तामाङ, पाँच वर्षीया फुर्वु याङजेन तामाङ र तीन वर्षीय निम छेवाङ तामाङ रहेका छन् ।
उनीहरुलाई त्रिशुली अस्पतालमा सामान्य उपचारका लागि काठमाडौं ल्याइएको छ ।
आमाछोदिङ्मो–४ का ४८ वर्षीय पासाङदे घले, १९ वर्षीया कामी याङ्जेन घले र २० वर्षीया लेताङ घले वेपत्ता रहेको प्रहरी निरीक्षक भण्डारीले बताए ।
प्रहरी नायव उपरीक्षक भागेन्द्रपुरूष ढकालको नेतृत्वमा घटनास्थल गएको प्रहरी टोलीले अहिले वेपत्ताको खोजी गरिरहेको छ ।
-1732353496.jpg)
