मोहन मैनालीको अनुवादमा 'आकाशमुखी' सार्वजनिक
परदेशी निबन्धहरूको सङ्ग्रह आकाशमुखी सार्वजनिक गरिएको छ।
लेखक एवं पत्रकार मोहन मैनालीद्वारा अनूदित निबन्धकृति शनिबार नेपाल प्रज्ञा-प्रतिष्ठानको डबलीमा आयोजित समारोहमा हरि शर्मा, सगुना शाह र अनुवादक मैनालीले संयुक्त रूपमा लोकार्पण गरे।
सङ्ग्रहमा बुकर टी. वाशिङ्टन, जर्ज बर्नार्ड शअ, सर रिचर्ड लिभिङस्टोन, सर फ्रान्सिस एडवार्ड योङहस्बेन्ड, भर्जिनिया उल्फ, साइभिय द मेस्थ्र, बेन जोन्सन, अल्दस हक्स्ले, फ्रान्सिस बेकन र जे.बी.एस. हल्देनका निबन्ध छन्। बोनसमा रिस्तो मिनेन्स्कीको एउटा कथा पनि राखिएको छ।
वक्ता शर्माले पुस्तकमा सङ्गृहीत विविध देश र लेखकका निबन्धहरूले फरक विचार र संसार बुझ्न सघाउने टिप्पणी गरे। उनले पुस्तकमा छानिएका निबन्धले पश्चिमा समाजको जीवन र समाज परिवर्तनका कथा बुनिरहँदा तिनले हामीलाई सफलताका निम्ति अनन्त यात्राको प्रेरणा पनि दिने बताए। अनूदित भएर पनि पुस्तक मौलिक जस्तो लाग्ने बताउँदै उनले सरल भाषाको प्रशंसा समेत गरे।
"सरल र सरस भाषामा लेख्ने मैनालीको कुशल निबन्धकारिताको प्रभाव अनुवादमा राम्ररी परेको देखिन्छ," शर्माले भने, "यो पुस्तक आफ्ना सन्तानलाई पढ्न सबैले सिफारिश गर्नुपर्छ। म चाहन्छु, यस्तो किताब त विद्यालयको कोर्समा होस्।"
अर्की वक्ता शाहले विश्वमै स्वतन्त्रता सङ्कटमा रहेको चर्चा गर्दै पुस्तकमा समेटिएका निबन्धहरूले समग्र मानिसदेखि लैङ्गिक तहसम्म सङ्घर्षदेखि स्वतन्त्रतासम्मको खोज गरेको बताइन्। भर्जिनिया उल्फका बलिया निबन्धले नारी शक्तिको उदाहरण दिंदै स्वतन्त्रता र समानताको मूल्यबोध गराएको उनको भनाइ थियो।
उनले भनिन्, "नारी शिक्षा, समानता, स्वतन्त्रताका लागि पश्चिमा समाजले कसरी सङ्घर्ष गरेको थियो भन्ने बुझ्न हाम्रो समाजका सबै वर्गको चेतनाका निम्ति यो पुस्तक प्रेरक हुन सक्छ।"
अनुवादक मोहन मैनाली ।
अनुवादक मैनालीले पुस्तकमा समेटिएका निबन्धहरू अनुवाद गर्दाको अन्तर्कथा र छनोट गर्नुको कारण सुनाएका थिए। फरक खालको विचार, संस्कार, परम्परा र भाषा भएका मानिसले लेखेका निबन्ध पढ्दा नेपाली पाठकलाई फाइदा पुग्ने सोचेर परदेशी निबन्धहरू अनुवाद गरेको उनले बताए।
बुक-हिल पब्लिकेशनले प्रकाशन गरेको पुस्तकको पेपरब्याक संस्करणको मूल्य ३३३ रुपैयाँ राखिएको छ।
-1732353496.jpg)
