एक दशकपछि सकियो सोलु करिडोर प्रसारण लाइन
पूर्वी नेपालको सोलु करिडोर १३२ केभी डबल सर्किट प्रसारण लाइन सञ्चालनमा आएको छ।
सोलु खोला जलाधारा क्षेत्रका जलविद्युत् आयोजनाबाट उत्पादित विद्युत् राष्ट्रिय प्रणालीमा प्रवाह गर्न यो प्रसारण लाइन निर्माण गरिएको हो। प्रारम्भिक काम शुरू भएको झण्डै एक दशकपछि प्रसारण लाइनको निर्माण सकिएको छ।
सरकारको लगानी र भारतीय निर्यात-आयात (एक्जिम) ब्यांकको सहुलितपूर्ण ऋणमा निर्माण सम्पन्न भएको प्रसारण लाइनलाई सोमबार बिहान ११ः३० बजे चार्ज गरी सञ्चालनमा ल्याइएको छ। सिराहाको मिर्चैयादेखि उदयपुर, ओखलढुंगा हुँदै सोलुखुम्बूको दूधकुण्ड नगरपालिकास्थित तिंलासम्मको प्रसारण लाइनको लम्बाइ ९० किलोमिटर छ भने ३०२ टावर छन्।
सोलु करिडोर प्रसारण लाइन आयोजना अन्तर्गत तिंलामा १३२/३३ केभी, ३० एमभिए र ३३/११ केभी, आठ एमभिए क्षमताको सबस्टेशन निर्माण गरिएको छ। सबस्टेशन निर्माण सम्पन्न गरी ७ भदौ २०७६ बाट सञ्चालनमा छ। तिंला सबस्टेशनबाटै सोलुखुम्बु, ओखलढुंगा र खोटाङमा विद्युत् आपूर्ति हुनेछ।
नेपाल विद्युत् प्राधिकरणका कार्यकारी निर्देशक कुलमान घिसिङले ठेकेदार छनोटमा भएको विवाद, सर्वोच्च अदालतको अन्तरिम आदेश, रुट परिवर्तन गर्न माग गर्दै स्थानीयबाट भएको अवरोध, जटिल भौगोलिक अवस्था लगायत कारण आयोजना निर्माणमा केही ढिलाइ भएको बताए।
“सोलु नदी बेसिनमा निजी क्षेत्रका जलविद्युत् आयोजनाको विद्युत् प्रवाहका लागि पूर्वाधार तयार भएको छ, निर्माण सम्पन्न भई बर्खाको समयमा पूर्ण क्षमतामा चल्न नसकेको २३.५ मेगावाटको सोलु खोला र निर्माणाधीन जलविद्युत् आयोजनाको प्रसारण पूर्वाधार अभावमा विद्युत् प्रवाहको समस्या समाधान भएको छ,” घिसिङले भने।
विद्युत् आयोजनाको विद्युत् सोलु करिडोरमा प्रवाह भएपछि मिर्चैयाबाट पूर्वतर्फ पठाएर सप्तरी, सुनसरी, मोरङ लगायत जिल्लामा आपूर्ति गर्न तथा बढी भएको विद्युत् ढल्केबर सबस्टेशनबाट भारततर्फ निर्यात गर्न पनि सजिलो हुने उनले बताए।
घिसिङले तिंला सबस्टेशनबाट विद्युत् आपूर्ति दिइने कारणले गर्दा अब सोलुखुम्बु, ओखलढुंगा र खोटाङको विद्युत् सेवा भरपर्दो र गुणस्तरीय हुने साथै चुहावट पनि घट्ने जनाएका छन्।
२३.५ मेगावाटको सोलु खोला सहित १८ मेगावाटको माथिल्लो सोलु, ८६ मेगावाटको सोलु खोला (दूधकोशी) ८२ मेगावाटको तल्लो सोलु खोला लगायत जलविद्युत् आयोजनाको विद्युत् तिंला सबस्टेशनमा जोडिनेछ। यही प्रसारण लाइन बन्ने भएपछि प्राधिकरणले त्यस क्षेत्रका १२ जलविद्युत् आयोजनासँग ३२५ मेगावाटको विद्युत् खरीद-बिक्री सम्झौता (पीपीए) गरेको छ।
सोलु करिडोर प्रसारण लाइनको निर्माणमा केही ढिला हुने देखिएपछि २३.५ मेगावाटको सोलु खोला जलविद्युत् आयोजनाको विद्युत् पोहोर फागुनबाट अस्थायी रूपमा ३३ केभी लाइनमा जोडिएको थियो।
प्रसारण लाइनको रुट सार्न माग गर्दे उदयपुरको कटारी नगरपालिका-४ मरुवामा करीब दुई वर्ष अवरोध भएको थियो। सोलु करिडोर प्रसारण लाइन आयोजना निर्माणमा धेरै ठूला समस्या र अवरोध भोगिएको र यसबाट पाठ सिक्दै अन्य आयोजना निर्माण गरिनुपर्ने आयोजना प्रमुख जनार्दन गौतमले बताए।
प्रसारण लाइन निर्माणका लागि भारतीय कम्पनी मोहन इनर्जीसँग २०७२ को चैतमा ठेक्का सम्झौता भएको थियो। ठेक्का सम्झौता २०७३ को असोजबाट कार्यान्वयनमा आएको थियो। यो आयोजनाको प्रारम्भिक काम एक दशकअघि आर्थिक वर्ष २०७६/७७ बाट शुरू भएको थियो।
-1732261651.jpg)
-1732259528.jpg)