कोरोनाबाट ३२ जनाको मृत्यु, ३५४० मा सङ्क्रमण
कोरोनाभाइरसको सङ्क्रमणबाट ३२ जनाको मृत्यु भएको छ भने नयाँ सङ्क्रमितको सङ्ख्या केही घटेको छ।
स्वास्थ्य तथा जनसङ्ख्या मन्त्रालयका अनुसार, आज देशभर ३२ जनाको मृत्यु भएको छ। शनिबार कोरोनाबाट ६ जनाको मृत्यु भएको थियो। योसँगै कोरोनाबाट मृत्यु हुनेको सङ्ख्या ११ हजार ७३५ पुगेको छ।
पछिल्लो २४ घण्टामा तीन हजार ५४० जनामा कोरोना सङ्क्रमण पुष्टि भएको छ। आज देशभर १३ हजार १४५ जनाको स्वाब परीक्षण गरिएको थियो।
आज सङ्क्रमण पुष्टि भएकामध्ये नौ हजार ९१० को पीसीआर परीक्षण गर्दा तीन हजार ४९ जनामा र तीन हजार २३५ को एन्टिजेन परीक्षण गर्दा ४९१ जनामा कोरोना देखिएको हो।
पछिल्लो २४ घण्टामा ६ हजार ३५९ जना निको भएका छन्। योसँग निको हुनेको सङ्ख्या पनि आठ लाख ५४ हजार ७०७ पुगेको छ।
