आज २० हजार परीक्षण गर्दा ८४५४ जनामा कोरोना
परीक्षण घटेपछि आज कोभिड-१९ सङ्क्रमितको सङ्ख्या पनि केही घटेको छ।
स्वास्थ्य तथा जनसङ्ख्या मन्त्रालयका अनुसार, आज २० हजार ३५९ जनाको स्वाब परीक्षण गर्दा आठ हजार ४५४ जनामा कोरोना पुष्टि भएको छ। मंगलबार २५ हजार ९०९ स्वाब परीक्षण गर्दा १२ हजार आठ जनामा कोरोना देखिएको थियो।
सङ्क्रमण पुष्टि भएकामध्ये १३ हजार ५४९ जनाको पीसीआर परीक्षण गर्दा पाँच हजार ५७१ जनामा र ६ हजार ८१० जनाको एन्टिजेन परीक्षण गर्दा दुई हजार ८८३ जनामा कोरोना देखिएको हो।
आज कोरोनाबाट पाँच जनाको मृत्यु भएको छ। मंगलबार आठ जनाले ज्यान गुमाएका थिए। योसँगै कोरोनाबाट मृत्यु हुनेको सङ्ख्या ११ हजार ६७२ पुगेको छ।
पछिल्लो २४ घण्टामा चार हजार ४३३ जना निको भएका छन्। निको हुनेभन्दा सङ्क्रमितको सङ्ख्या धेरै भएकाले सक्रिय सङ्क्रमित भने थपिंदै गएका छन्। आज सक्रिय सङ्क्रमितको सङ्ख्या ९० हजार ६७ पुगेको छ।
