माघ पहिलो साताबाट ‘बुस्टर डोज’ दिइने
स्वास्थ्य तथा जनसङ्ख्या मन्त्रालयले अग्रपङ्क्तिमा काम गर्ने र ६० वर्षभन्दा माथिका ज्येष्ठ नागरिकलाई कोभिड–१९ विरुद्ध ‘बुस्टर डोज’ दिने भएको छ।
मन्त्रालयका सचिव डा. रोशन पोखरेलले माघको पहिलो हप्ताबाट अग्रपङ्क्तिमा काम गर्ने चिकित्सक, स्वास्थ्यकर्मी, सुरक्षाकर्मीलाई र माघको दोस्रो हप्ताबाट रोग प्रतिरोधात्मक क्षमतामा कम भएका तथा ६० वर्षमाथिका सबैलाई बुस्टर डोज दिन लागिएको बताए।
सम्भावित कोरोनाभाइरसको तेस्रो लहरलाई दृष्टिगत गर्दै बुस्टर डोज दिन लागिएको बताए। नेपालमा अहिले कूल परीक्षण गराएकामध्ये कोभिड-१९ सङ्क्रमण ८.४९ प्रतिशतमा देखिएको छ। शुक्रबार मात्र १४ हजार ९७१ जनामा परीक्षण गर्दा ९६८ जनामा सङ्क्रमण देखिएको थियो।
कोभिड-१९ खोप सल्लाहकार समितिको सिफारिशमा मन्त्रालयले बुस्टर डोज दिने भएको हो। यसअघि गम्भीर प्रकृतिका रोग भएका बिरामी र रोग प्रतिरोधात्मक क्षमता कम भएका व्यक्तिलाई बुस्टर डोज दिने तयारी गरिएको थियो।
मन्त्रालयले सबै नागरिकलाई कोभिड-१९ विरुद्धको पूरा मात्रा खोप लगाएपछि मात्र बुस्टर डोज दिने निर्णय गरेपछि एक दिन लगाएर स्थगित गरिएको थियो। मन्त्रालयले राष्ट्रिय खोप अभियान द्रुत गतिमा सञ्चालन गरेर यही पुसभित्रमा लक्षित सबैलाई खोप लगाउने तयारी गरेको जनाएको छ।
यस्तै, मन्त्रालयले कोभिड-१९ विरुद्धको पूर्ण खोप लगाएको तीन महीना पुगेका अग्रपङ्क्तिमा रहेका चिकित्सक, स्वास्थ्यकर्मी, सुरक्षाकर्मी, स्वास्थ्यसंस्थामा काम गर्ने कर्मचारी, सरकारी निकायमा काम गर्ने कर्मचारीलाई खोपको अतिरिक्त एक मात्रा खोप लगाइनेछ।
कोभिड-१९ विरुद्धको पूर्ण मात्रा खोप लगाएको तीन महीना पुगेका ६० वर्षभन्दा माथिका ज्येष्ठ नागरिकको साथै मध्यम तथा गम्भीर रुपमा रोग प्रतिरोधात्मक क्षमता कम भएका व्यक्ति सक्रिय क्यान्सरका रोगी, अङ्ग प्रत्यारोपण गरेका बिरामी, एचआइभी भएका बिरामी, उपचारका क्रममा रोग प्रतिरोधात्मक क्षमता कम गराउने औषधि सेवन गरिरहेका बिरामीलाई पनि अतिरिक्त मात्रा खोप दिइने जनाएको छ। अहिले सरकारसँग एक करोड दुई लाख मात्रा खोप रहेको छ। (रासस)
-1732180391.jpg)
