हिमपातले रसुवामा जनजीवन प्रभावित

रसुवा जिल्लाका विभिन्न स्थानमा हिमपात भएको छ।

रसुवाको क्यान्जिन उपत्यका, लाङटाङ, थुमन, बृद्धिम, गत्लाङ, चिलिमे लगायत विभिन्न स्थानमा हिमपात भएको स्थानीयले बताएका छन्।

त्यसै गरी, गोसाइँकुण्ड तथा यस पदमार्गको चोलाङपाटी, लौरिविना, बुद्ध मन्दिर लगायत क्षेत्रमा बाक्लो हिमपात भएको छ। गत्लाङ आसपासमा करीब १ फिट हिउँ जमेको स्थानीय अनिल लामाले बताए। ‘यहाँ रातिदेखि नै हिउँ परिरहेको छ,’ उनले भने, ‘गत्लाङ गाउँमा एक फिट हिउँ पुग्न लाग्यो, पार्वतीकुण्डतिर चाहिं एक फिटभन्दा बढी जमेको छ ।’

लामाका अनुसार, गत्लाङका स्थानीयमध्ये अधिकांश कृषक भएकाले गोठबाट गाईवस्तु घरतिर ल्याउने तथा गोठमा घाँस पुर्‍याउने काम गरिरहेका छन् ।

जिल्ला सदरमुकाम धुन्चेमा करीब तीन वर्षपछि हिमपात भएको छ। यसअघि धुन्चेमा २५ माघ २०७५ मा हिमपात भएको थियो। हिउँ परेसँगै बाली सप्रिने आशामा किसान खुशी भएको नागरिक समाजका अध्यक्ष बाबुलाल तामाङले बताए।