कमल थापा र राजेन्द्र लिङदेनले दिए अध्यक्षमा उम्मेदवारी
राष्ट्रिय प्रजातन्त्र पार्टीको अध्यक्षका लागि कमल थापा र राजेन्द्र लिङदेनले उम्मेदवारी दर्ता गराएका छन्।
काठमाडौंको भृकुटीमण्डपस्थित निर्वाचन कार्यालयमा शुक्रबार थापा र लिङदेनले उम्मेदवारी दर्ता गराएका हुन्। दुवै जनाले प्यानल सहित उम्मेदवारी दिएका हुन्।
थापाको प्यानलबाट उपाध्यक्षमा विक्रम पाण्डे, बुद्धिमान तामाङ, ध्रुवबहादुर प्रधान र रोशन कार्कीले उम्मेदवारी दर्ता गराएका छन्। महामन्त्रीमा भास्कर भद्रा, भुवन पाठक र कुन्तीकुमारी शाही छन्।
लिङदेनको प्यानलबाट उपाध्यक्षमा विक्रम पाण्डे, दिलविकास राजभण्डारी, रामचन्द्र राय र लीला श्रेष्ठले उम्मेदवारी दर्ता गराएका छन्। त्यस्तै, महामन्त्रीमा धवलशमशेर राणा, श्याम तिमिल्सिना र रेखा थापाले उम्मेदवारी दिएका छन्। पाण्डे दुवै समूहमा परेका छन्।
आज उम्मेदवारी दर्ता भएको छ भने भोलि चुनाव हुनेछ। राप्रपाका महाधिवेशन प्रतिनिधिले आठ जना पदाधिकारी र १४१ केन्द्रीय सदस्य चयन गर्नेछन्।
