महिला टी-२० विश्वकप छनोटमा नेपालको शानदार जित
आईसीसी महिला टी-२० विश्वकप छनोटको दोस्रो खेलमा नेपालले शानदार जित हासिल गरेको छ।
एशिया क्षेत्रको छनोट अन्तर्गत मंगलबार दुबईमा भएको खेलमा बलरले उत्कृष्ट प्रदर्शन गरेपछि नेपालले भुटानलाई आठ विकेटले पराजित गरेको हो। भुटानले दिएको ६२ रनको लक्ष्य नेपालले ८.३ ओभरमै पूरा गरेको छ।
नेपालका लागि इन्दु बर्माले १८, सीता राना मगरले १७, रुबिना क्षेत्रीले १० र कविता जोशीले आठ रन बनाए। भुटानका लागि टासी चेकीले एक विकेट लिइन्।
यसअघि टस जितेर ब्याटिङ गरेको भुटानले ६ विकेटको क्षतिमा ६१ रन मात्रै बनाउन सक्यो। भुटानका लागि प्रारम्भिक खेलाडी नवाङ छोदेनले १३ र सोनाम पाल्दोनले ११ रन बनाए। अन्य खेलाडीले दोहोरो अङ्क पनि जोड्न सकेनन्।
नेपालका लागि सीता राना मगरले तीन विकेट लिइन्। उनले चार ओभरमा १० रन मात्रै दिइन्। त्यस्तै, करुणा भण्डारीले एक विकेट लिइन्। उनले चार ओभरमा एक मिडियन राख्दै ६ रन मात्रै खर्चिइन्।
नेपालले अर्को खेल बिहीबार कुवेतसँग खेल्नेछ। पहिलो खेलमा नेपाल हङकङसँग पराजित भएको थियो।
-1732261651.jpg)
-1732259528.jpg)
