प्रधानमन्त्री देउवाले पाए विश्वासको मत
प्रधानमन्त्री शेरबहादुर देउवाले आइतबार प्रतिनिधि सभामा विश्वासको मत पाएका छन्।
प्रतिनिधि सभामा भएको मत विभाजनमा विश्वासको मतको पक्षमा १६५ सांसदले मत दिए। त्यस्तै, विपक्षमा ८३ सांसदले मत दिए। मत दिन्नँ भन्नेमा १ मत परेकाे छ।
नेपालको संविधानको धारा ७६ को उपधारा ६ अनुसार देउवाले प्रतिनिधि सभामा पेश गरेको विश्वासको मतको पक्षमा बहुमत पुगेकाले प्रतिनिधि सभाको विश्वास रहेको सभामुख अग्निप्रसाद सापकोटाले सदनमा जानकारी दिए।
नेपाली कांग्रेस, नेकपा (माओवादी केन्द्र), जनता समाजवादी पार्टी (जसपा) र राष्ट्रिय जनमोर्चाका सांसदले देउवालाई मत दिए। त्यस्तै, नेकपा (एमाले)का वरिष्ठ नेता माधवकुमार नेपालसहित २२ जना सांसदले देउवालाई मत दिए।
प्रधानमन्त्री देउवालाई विश्वासको मतका लागि १३६ सांसदको समर्थन आवश्यक थियो। २७५ सदस्यीय प्रतिनिधि सभामा अहिले २७१ सांसद रहेका छन्।
सर्वोच्च अदालतले २८ असारमा प्रतिनिधि सभा पुनःस्थापना गर्दै सात दिनभित्र बैठक बोलाउन आदेश दिएको थियो। त्यही अनुसार, सरकारको सिफारिशमा राष्ट्रपति विद्यादेवी भण्डारीले प्रतिनिधि सभाको अधिवेशन आह्वान गरेकी हुन्।
देउवा २९ असारमा नेपालको संविधानको धारा ७६ को उपधारा ५ अनुसार प्रधानमन्त्री नियुक्त भएका थिए। यस उपधारा अनुसार, नियुक्त प्रधानमन्त्रीले ३० दिनभित्र प्रतिनिधि सभाबाट विश्वासको मत लिनुपर्ने संवैधानिक व्यवस्था रहेको छ। त्यही व्यवस्था अनुसार, देउवाले आज विश्वासको मत लिएका हुन्।
-1732261651.jpg)
-1732259528.jpg)
