विश्वासको मत माग्दै देउवाले भने- असल कामका लागि ओलीजीलाई धन्यवाद
_1626612561.jpg)
प्रधानमन्त्री शेरबहादुर देउवाले निवर्तमान प्रधानमन्त्री केपी शर्मा ओलीलाई धन्यवाद ज्ञापन गरेका छन्।
आइतबार प्रतिनिधि सभा बैठकमा विश्वासको मत माग्दै देउवाले राम्रा काम लागि ओलीलाई धन्यवाद दिएका हुन्। बैठकमा उनले भने, “माननीय केपी शर्मा ओलीजीले साढे तीन वर्ष सरकारको नेतृत्व गर्नुभएको छ, उहाँले गर्नुभएका असल कामका लागि धन्यवाद दिन चाहन्छु।”
नेपाली कांग्रेसका सभापति समेत रहेका प्रधानमन्त्री देउवाले विगतमा भएका राम्रा कामहरूलाई निरन्तरता दिँदै कमीकमजोरीलाई सुधार गर्दै जाने र नयाँ कामलाई पनि निरन्तरता दिने बताए। “ओलीजीको अनुभव हाम्रा लागि उपयोगी हुनेछ भन्ने विश्वास लिएको छु,” देउवाले बैठकमा भने।
देउवाले प्रतिनिधि सभाका सम्पूर्ण सदस्यहरूसँग आफूलाई विश्वासको मत दिन आग्रह गरे। सर्वोच्च अदालतको परमादेशपछि २९ असारमा प्रधानमन्त्री नियुक्त भएका देउवालाई विश्वासको मतका लागि कम्तीमा १३६ सांसदको समर्थन आवश्यक पर्दछ।
प्रधानमन्त्री देउवाको सम्बोधनको पूर्णपाठ:
प्रतिनिधि सभा विघटन पश्चात सम्मानीय सर्वोच्च अदालतको फैसलाले प्रतिनिधि सभा पुनस्र्थापित भएको छ। आज सभाको आठौं अधिवेशन प्रारम्भ भईरहेको छ। म सबैभन्दा पहिले सबै माननीय सदस्यहरूलाई हार्दिक बधाई दिन चाहन्छु। नेपाली जनताको ठूलो त्याग, तपस्या र बलिदानले देशमा संघीय, लोकतान्त्रिक गणतन्त्रको स्थापना भएको छ। ईतिहासको लामो कालखण्डमा लोकतन्त्रका लागि भएका राजनीतिक संघर्षमा बलीदान गर्ने सम्पूर्ण शहिदहरुलाई सम्मानपूर्वक स्मरण गर्दै हार्दिक श्रद्धान्जली व्यक्त गर्दछु। लोकतन्त्रको स्थापना र संरक्षणका लागि योगदान गर्नु हुने सबै नेपाली नागरिककाप्रति हार्दिक सम्मान व्यक्त गर्दछु।
पटक–पटकको प्रतिनिधि सभा विघटनका कारण विगत केही समय देशमा राजनीतिक अन्यौल र अनिश्चितताको स्थिति रह्यो । नेपालको संविधानको धारा ७६ (३) बमोजिम नियुक्त हुनु भएका निवर्तमान प्रधानमन्त्री माननीय के.पी. शर्मा ओलीजीले धारा ७६ (४) बमोजिम प्रतिनिधि सभामा विश्वासको मत नलिई धारा ७६ (५) बमोजिम प्रधानमन्त्री नियुक्तिका लागि प्रक्रिया प्रारम्भ गर्न सम्माननीय राष्ट्रपतिलाई अनुरोध गर्नु भएपछि नयाँ प्रधानमन्त्री नियुक्तिको प्रकृया प्रारम्भ भयो। केही समयको राजनीतिक र संवैधानिक अभ्यास पश्चात म नेपालको संविधानको धारा ७६ को उपधारा (५) बमोजिम प्रधानमन्त्री नियुक्त भएको छु। र, मेरो नेतृत्वमा मन्त्री परिषद् गठन भएको छ।
मलाई प्रधानमंन्त्रीमा नियुक्त हुन सहयोग र समर्थन गर्नु हुने राजनीतिक दलका नेताहरु, माननीय सदस्यहरु लगायत सबैमा हार्दिक धन्यवाद दिन चाहन्छु । यो सरकारलाई भविष्यमा पनि निरन्तर सहयोग र समर्थन रहने विश्वास पनि लिएको छु।
अहिले मुलुक निकै जटिल अवस्थामा छ। विश्वव्यापी रुपले फैलिएको कोभिड–१९ को प्रकोपले हामी निकै प्रभावित भएका छौं। दैनिक रुपले संक्रमण बढी रहेको छ । मानिसहरुको मृत्यु भईरहेको छ। म कोभिड—१९ का कारण मृत्यु भएका सबैको आत्माको चीर शान्तिको कामना गर्दछु। शोक सन्तप्त परिवारजनमा गहिरो समवेदना व्यक्त गर्दछु। अस्पतालमा उपचार गराईरहनु भएका सबैको शीघ्र स्वास्थलाभको कामना गर्दछु। कोभिड—१९ को नियन्त्रण र रोकथामका लागि अहोरात्र खटेर काम गर्नु हुने सबैमा हार्दिक धन्यवाद दिन चाहन्छु। नेपाली नागरिकलाई कोभिड—१९ को प्रकोपबाट जोगाउने यो सरकारको पहिलो प्राथमिकता हुनेछ। सरकारले कोभिड—१९ को नियन्त्रण र रोकथामका लागि सबै उपायहरु अवलम्बन गर्नेछ भन्ने म प्रतिवद्धता व्यक्त गर्दछु।
हामी यहाँ उपस्थित सबै राजनीतिक दलहरूको प्रयत्नबाट नेपालको संविधान निर्माण भएको हो । संघीय लोकतान्त्रिक गणतन्त्रको स्थापना भएको छ। यसको संरक्षण र सुदृढीकरण पनि हामी सबैको प्रयासबाट मात्र सम्भव छ। बहुदलिय व्यवस्थामा फरक–फरक राजनीतिक बिचार हुने तीनका बिचमा प्रतिस्पर्धा हुने, स्वस्थ आलोचना प्रत्यालोचना हुने विषयहरु स्वाभाविक र राम्रा हुन। ती आवश्यक पनि छन। तथापी हाम्रा केहि साझा चुनौति, उद्देश्य र गन्तव्य छन्। जस्का लागि हामीले सहकार्य र सहयात्रा गर्नु पर्छ। कोभिड—१९ हाम्रो तत्कालको चुनौति हो। गरिबी, वेरोजगारी, अशिक्षा जस्ता तमाम साझा समस्या छन। नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता, स्वाभिमान हाम्रा साझा विषय हुन। नेपालको संविधानको संरक्षण र यसको असल कार्यान्वयन हाम्रो साझा गन्तव्य हो। संघीय लोकतान्त्रिक गणतन्त्रात्मक शासन व्यवस्थाको माध्यमवाट दिगो शान्ति, सुशासन, विकास र समृद्धिको आकांक्षा पूरा गर्नु हामी सबैको साझा उद्देश्य हो । यसका लागि हाम्रा बिचमा सहकार्य र सहयात्राको आवश्यकता छ।
हामी सबैसंग आ–आफ्ना अनुभवहरू छन। माननीय के.पी. शर्मा ओलीले विगत साढे तीन वर्ष सरकारको नेतृत्व गर्नुभएको छ। उहाँले गर्नु भएका असल कामका लागि म धन्यवाद दिन चाहन्छु। उहाँको अनुभव हाम्रा लागि उपयोगी हुनेछ। विगतमा भएका राम्रा कामहरुलाई निरन्तरता दिदै कमी कमजोरी सुधार गर्दै लानुपर्नेछ। महत्वपूर्ण नयाँ कामहरु पनि गर्नुछ। देशमा सुशासन कायम गर्नुछ। यसका लागि सरकार, प्रमुख प्रतिपक्ष र सबै राजनीतिक दलहरूबीच निरन्तर सम्वाद, सहकार्य र सामुहिक प्रयत्न आवश्यक छ भन्ने मेरो मान्यता छ र यसका लागि म सदैव प्रयत्नशिल रहने छु। हामी राजनीतिक दलहरू एक अर्काका शत्रु होईनौ बरु हाम्रा साझा उदेश्य प्राप्तिका लागि सहयात्री हौ भन्ने भावनाका साथ काम गर्नुपर्दछ।
संसदीय लोकतन्त्रको स्थापनाका लागि देशमा लामो त्याग तपस्या र बलिदानपूर्ण संघर्ष भएको हो। संसदलाई अधिकार सम्पन्न, जीवन्त र क्रियाशील बनाउनु पर्दछ। सरकार संसदप्रति उत्तरदायी रहनु पर्दछ भने संसदले सरकारका सबै गतिविधिप्रति ध्यान दिई अनुगमन गर्नु
पर्दछ। यसले लोकतान्त्रिक प्रणालीलाई बलियो बनाउँछ। निरन्तरको राजनीतिक अन्यौल, अनिश्चितता र अस्थिरताले लोकतन्त्रलाई नै कमजोर गर्दछ। तसर्थ अब हामी राजनीतिक स्थिरताको बाटोमा हिड्न जरुरी छ।
म नेपालको संविधानको धारा ७६ (५) बमोजिम नियुक्त प्रधानमन्त्री भएको हुँदा नेपालको संविधानको धारा ७६ को उपधारा (६) बमोजिम विश्वासको मत प्राप्त गर्न सम्मानित प्रतिनिधि सभामा प्रस्तुत भएको छु। सबै माननीय सदस्यहरुले मलाई विश्वासको मत दिनु हुनेछ भन्ने विश्वास गरेको छु। धन्यवाद!
-1732261651.jpg)
-1732259528.jpg)
