जसपाबाट को-को बन्दै छन् मन्त्री?

जनता समाजवादी पार्टी (जसपा)कोे महन्थ ठाकुर पक्षबाट १० जना मन्त्री बन्न लागेका छन्। जसपा अध्यक्ष ठाकुरले मन्त्रीहरूको सूची प्रधानमन्त्री केपी शर्मा ओलीलाई बुझाएका छन्।

अध्यक्ष ठाकुरले मन्त्री बन्नेहरूको नाम शुक्रबार ओलीलाई बुझाएको जसपा केन्द्रीय कार्यकारिणी सदस्य लक्ष्मणलाल कर्णले जानकारी दिए। “अध्यक्षज्यूले मन्त्री बन्नेहरूको नाम बुझाइसक्नु भएको छ, जो-जो मन्त्री बन्छन् उहाँहरूलाई खबर आउँछ,” कर्णले हिमालखबरसँग भने।

कर्णका अनुसार जसपाबाट ८ मन्त्री र २ जना राज्यमन्त्री बन्न लागेका हुन्।

स्रोतका अनुसार, मन्त्रीका लागि राजेन्द्र महतो, शरतसिंह भण्डारी, अनिल झा, लक्ष्मणलाल कर्ण, बिमल श्रीवास्तव, उमाशंकर अरगरिया, चन्दा चौधरी र इकवाल मियाँकाे नाम पठाइएको हो।

पूर्वमन्त्री महतोलाई उप-प्रधानमन्त्री समेत बनाउन प्रस्ताव गरिएको छ।

त्यस्तै रेणुका गुरुङ र चन्द्रकान्त चौधरीलाई राज्यमन्त्री बनाउन प्रस्ताव गरिएको स्रोतले जानकारी दिएको छ।