कोभिड-१९ : भारतभन्दा नेपालको अवस्था 'डरलाग्दो'
कोभिड-१९ महामारीको अवस्था भारतभन्दा नेपालमा 'डरलाग्दो' रहेको तथ्यांकले देखाएको छ। चिकित्सकहरूले पनि अझै ढुक्क हुने अवस्था नरहेको बताएका छन्।
भारत तथा नेपालको स्वास्थ्य मन्त्रालयको तथ्यांक अनुसार संक्रमण दर नेपालमा उच्च देखिएको छ। अहिलेसम्म नेपालमा प्रति १० लाखमा २५५ जनामा संक्रमण देखिएको छ। जबकी भारतमा प्रति १० लाखमा १४९ जनामा मात्रै संक्रमण देखिएको छ।
सोमबार बिहानसम्मको तथ्यांकअनुसार नेपालमा संक्रमितको संख्या पाँच लाख ५७ हजार १२४ पुगेको छ। भारतमा दुई करोड ८० लाख ४७ हजार ५३४ जनामा संक्रमण देखिएको छ।
कोरोनाबाट मृत्यु हुने दर पनि भारतको भन्दा नेपालमा उच्च रहेको छ। नेपालमा प्रति १० लाखमा ५ जनाको मृत्यु भएको छ। जबकी भारतमा प्रति १० लाखमा २.८ जनाको मृत्यु भएको छ।
अहिलेसम्म नेपालमा कोरोनाबाट सात हजार २७२ जनाले ज्यान गुमाएका छन्। भारतमा तीन लाख २९ हजार १२७ जनाको ज्यान गएको छ।
अहिलेसम्म देखिएका संक्रमितमध्ये मृत्यु हुनेको प्रतिशत पनि भारतको भन्दा नेपालमा बढी छ। संक्रमित भएकामध्ये नेपालमा १.३ जनाको ज्यान जाने गरेको छ। भारतमा भने १.२ जनाको ज्यान गएको छ।
कोभिड–१९ संक्रमण दर पनि भारतको भन्दा नेपालमा उच्च देखिएको छ। स्वास्थ्य मन्त्रालयका अनुसार नेपालमा कोरोना संक्रमणदर ३७.७ प्रतिशत रहेको छ। जबकी भारतमा १०.४ प्रतिशत रहेको छ।
स्वास्थ्य मन्त्रालयका डा. विराज कर्माचार्य संक्रमणदर ५ प्रतिशतभन्दा कम हुनुपर्ने बताउँछन्। संक्रमणदर ५ प्रतिशतभन्दा बढी हुँदा दैनिक पुष्टि हुने संक्रमितको संख्याभन्दा वास्तविक संक्रमित बढी हुने बताउँछन्।
संक्रमित निको हुनेदर पनि नेपालमा भारतको भन्दा कम रहेको छ। भारतमा अहिलेसम्म ९०.३ प्रतिशत संक्रमित निको भएका छन्। नेपालमा भने ७८.१ प्रतिशत संक्रमित मात्रै निको भएका छन्।
अहिलेसम्म भारतमा दुई करोड ५६ लाख ९२ हजार ३४२ संक्रमित निको भएका छन्। नेपालमा चार लाख ४० हजार ९५५ जना निको भएका छन्।
सक्रिय संक्रमितको प्रतिशत पनि नेपालमै उच्च रहेको छ। भारतमा ८.५ प्रतिशत सक्रिय संक्रमित छन भने नेपालमा २०.७ प्रतिशत सक्रिय संक्रमित रहेका छन्।
दक्षिण एसियाका अन्य देशको तुलनामा पनि नेपालको अवस्था राम्रो देखिएको छैन। धेरै देशको तुलनामा नेपालमा संक्रमण र मृत्युदर उच्च रहेको छ।
-1732261651.jpg)
-1732259528.jpg)
-1732180391.jpg)