यस्तो देखियो काठमाडौँमा महिला मार्च (तस्वीरहरू)

बृहत् नागरिक आन्दोलनले सबै प्रकारका महिला हिंसा, हत्या र दण्डहीनताको समूल अन्त्यको माग गर्दै काठमाडौँमा शुक्रबार महिला मार्च निकालेको छ ।

वसन्तपुरबाट शुरु भएको महिला मार्च न्यूरोड, रत्नपार्क, भद्रकाली हुँदै सिंहदरबार मूल गेटमा आएर समापन भएको थियो। महिला मार्चमा मैना सुनुवारदेखि निर्मला पन्तसम्म, अंगिरा पासीदेखि भागरथी भट्टसम्मको बलात्कारपछिको हत्या शृङ्खला सदाको लागि बन्द हुनुपर्ने, पीडितहरुले न्याय पाउनुपर्ने, अपराधी र बलात्कारीले उन्मुक्ति पाउन नहुने लगायत नारा लगाइएको थियो।

मार्चमा सहभागी महिला कलाकारले महिला विरुद्धको हत्या हिंसा लगायतबारे प्रतीकात्मक नाटक प्रदर्शन गरेका थिए। वसन्तपुरबाट शुरु भएको महिला मार्चमा एक जना युवतीको शव बनाई कलाकारहरुले शवयात्रा नै गरेका थिए । असंवैधानिक कदमको दाहसंस्कार गरिएको भन्दै प्रतीकात्मक रुपमा शवयात्रा गरिएको आयोजकले जनाएका छन्।

महिला मार्चपछि आयोजिक सभालाई सम्बोधन गर्दै महिला अधिकारकर्मीहरूले देशमा महिला एवं बालिकाहरु असुरक्षित भएको र सरकारले उनीहरुलाई न्याय दिन नसकेको भन्दै आक्रोश पोखेका थिए।