हिमपातका कारण चीनसँगको सीमावर्ती लिमी गाउँ जाने बाटो बन्द, खुल्न पाँच महीना लाग्ने
हिमपातका कारण बाटो बन्दा हुँदा हुम्लाको उत्तरी नाम्खा गाउँपालिकास्थित लिमी गाउँमा पाँच महिना आवतजावत रोकिने भएको छ।
लिमी प्रवेश गर्ने दुईवटै नाका हिमपातपछि बन्द हुँदा त्यहाँ पुग्ने अर्को कुनै विकल्प नभएको त्यहाँका वडाध्यक्ष पाल्जोर तामाङले बताए। केही दिनअगाडिको हिमपातले लिमी प्रवेश गर्ने बाटोमा रहेको चार हजार ६०० मिटर अग्लो नारा लेक र पाँच हजार मिटर अग्लो न्यालु लेकको बाटो बन्द भएको हो।
यी दुवै बाटो अब आगामी जेठमा मात्रै खुल्ने छन्। पाँच महिनाका लागि बाटो बन्द भएपछि लिमीका स्थानीय थुनिएका छन्। दुवै नाकामा चारदेखि पाँच फिटसम्म हिउँ जम्ने गरेको छ।
त्यहाँ जडान गरिएको नेपाल टेलिकमको भिस्याट टेलिफोन सेवा बादल लाग्दा र हिमपात हुँदा बन्द हुन्छ। अहिले लिमी सञ्चार सम्पर्कविहीन भएको छ। यद्यपि बेलाबेला आउजाउ भइरहने वल्र्डलिङ्कको इन्टरनेट सेवा भने सम्पर्कको माध्यम भएको हल्जी गाउँका स्थानीयवासीले बताएका छन्।
बाटो बन्द भएपछि बिरामी तथा अत्यावश्यक काम पर्दा त्यहाँका स्थानीयलाई हेलिकोप्टर रिजर्भ गर्नुको अन्य विकल्प छैन। हिमपातपछि बाटो बन्द हुने भएका कारण छ महिनाका लागि दैनिक उपभोग्य सामानदेखि अन्य आवश्यक बन्दोबस्तीका सामान त्यहाँका स्थानीयले तयारी अवस्थामा राख्छन्।
तर, यो वर्ष कोरोनाको कारणले दैनिक उपभोग्य वस्तुको जोहो निकै कम भएको बताइएको छ। गएको मङ्सिरमा खाद्य व्यवस्था तथा व्यापार लिमिटेड कम्पनीबाट ढुवानी अनुदानको ७०० क्विन्टल खाद्यान्न लिमी पुगेको थियो। लिमी उपत्यकाका साथै हिल्सा नाका पनि हिमपातपछि बन्द भएको छ।
-1732261651.jpg)
-1732259528.jpg)