बागमती प्रदेशले गोसाइकुण्ड, इन्द्रसरोवर र दोलखामा रोपवे बनाउने
बागमती प्रदेशको भौतिक पूर्वाधार विकास मन्त्रालयले प्रदेशका विभिन्न तीन क्षेत्रमा रोपवे निर्माण गर्ने भएको छ।
मन्त्रालयले मकवानपुरको इन्द्रसरोवर, रसुवाको गोसाइकुण्ड र दोलखामा रोपवे तथा केबलवे निर्माणका लागि अध्ययन शुरु गरेको प्रदेशका भौतिक पूर्वाधार विकासमन्त्री रामेश्वर फुँयालले जानकारी दिए। उनले रोपवे निर्माणका लागि अध्ययन, विस्तृत अध्ययन प्रतिवेदन (डीपीआर) तयार तथा निर्माण कार्य प्रारम्भ गर्न मन्त्रालयमा चरणबद्ध छलफल भइरहेको बताए।
मन्त्री फुँयालले देशमा हाल विद्युत् उत्पादन बढ्दै गएको सन्दर्भमा विद्युतीय ऊर्जामार्फत सञ्चालन हुने यातायातका साधनलाई प्राथमिकता दिइनुपर्ने बताए। फुँयालले विद्युतीय ऊर्जामार्फत सञ्चालन हुने सडक सवारी तथा रोपवे निर्माण सरकारको प्राथमिकतामा पर्ने बताए।
प्रदेश सरकारले अत्यावश्यक स्थानमा कुनै पनि प्रकारको ऊर्जाको प्रयोगविना सञ्चालन गर्न सकिने ग्राभिटी रोपवे (गुरुत्वाकर्षणका कारण सञ्चालन हुने) निर्माणबारे समेत अध्ययन शुरु गरेको उनले जानकारी दिए। १०२ वर्ष अगाडि राणा प्रधानमन्त्री चन्द्रशम्शेरको पालामा निर्माण गरिएको हेटौँडा काठमाडौँ रोपवे पुनः सञ्चालन गर्न सकिने वा नसकिने अध्ययन गरेर पुनःनिर्माण गर्न सकिने भए गर्ने तथा नसकिने भए त्यसका संरचनालाई हटाएर व्यवस्थित गरिने उनको भनाइ छ।
त्यसका लागि लागि मन्त्रालय अध्ययन समिति निर्माण गर्ने क्रममा रहेको र समितिको प्रतिवेदन प्राप्तिपछि प्रतिवेदनका आधारमा काम गरिने उनले बताए। “लामो समयसम्म भारत तथा नेपालका तराई क्षेत्रबाट सडक यातायातमार्फत हेटौँडासम्म ल्याइएका सामग्रीलाई काठमाडौँसम्म ढुवानी गर्न प्रयोग भएर हाल बन्द रहेको उक्त रोपवेको संरचनाका कारण जोखिम बढेकाले त्यसको व्यवस्थापन आवश्यक भइसकेको छ”, मन्त्री फुँयालले भने।
-1732180391.jpg)
-1732099242.jpg)