पर्वतीय उडानमा यात्रुको आकर्षण, एकैदिन आठ उडान
सर्वोच्च शिखर सगरमाथासहितका हिमालको मनोरम दृश्वावलोकन गर्न पाउने भएपछि मुलुकको पर्वतीय उडानमा यात्रुको आकर्षण बढेको छ।
कोभिड–१९ सङ्क्रमणकै बीच २० मंसीरदेखि सञ्चालनमा आएको पर्वतीय उडान उत्साहवर्द्धक भइरहेको एअरलाइन्सले जनाएका छन्। बन्दाबन्दीको झण्डै नौ महीनापछि खुलेको पर्वतीय उडानमा आन्तरिक पर्यटकको आकर्षण बढेको छ। कोभिडअघि प्रायः विदेशीका लागि मात्र हुने पर्वतीय उडानमा नेपालीहरू हिमाल अवलोकन गर्न औधि रुचाएका छन्।
नेपाली यात्रुलाई लक्षित गर्दै एअरलाइन्सले छुटसहितका अफर ल्याएपछि यो उडानमा झनै यात्रु ओइरिएका छन्। निजी वायुसेवा कम्पनी बुद्ध र यती एअरलाइन्सले हरेक शनिबार पर्वतीय उडान गर्दै आएका छन्। दुवै कम्पनीले एक टिकट खरिदमा अर्को सित्तैमा उपलब्ध गराएका हुन्। शनिबार एकै दिन आठ पर्वतीय उडान भएका छन्। बुद्ध एअरका पाँच र यती एअरका तीन उडान भएका हुन्।
यतीको सिमराबाट पनि पर्वतीय उडान तय गरेको भए पनि मौसम खराबीका कारण उडान रद्द भएको कम्पनीले जनाएको छ। त्रिभुवन अन्तर्राष्ट्रिय विमानस्थलबाट बिहान ७ः०० बजे पर्वतीय उडान हुने गरेको छ। अघिल्लो शनिबार दुवै कम्पनीका उडान रद्द भएकाले पनि आज एकै दिन धेरै उडान भएका हुन्।
गत शनिबार बुद्धका चार र यतीका (सिमरासहितं) चार उडानमध्ये यतीले एक मात्र उडान गरेको थियो। आज बुद्ध एयरले पाँच उडानमार्फत ३०० यात्रुलाई सगरमाथा अवलोकन गराएको जनाएको छ।
यतीको सातामा दुई दिन पर्वतीय उडान
यती एअरलाइन्सले यात्रुको मागलाई मध्यनजर गर्दै सातामा दुई दिन पर्वतीय उडान गर्ने भएको छ। हाल शनिबार मात्र पर्वतीय उडान गर्दै आएको यतीले हरेक आइतबार पनि उडान गर्ने भएको हो।
भोलि आइतबारका लागि दुई उडान निर्धारण गरिएको कम्पनीले जनाएको छ। यती एअरलाइन्सका उडान सुरक्षा प्रमुख एवं प्रवक्ता सुदर्शन बर्तौलाले यात्रुको मागबमोजिम हरेक शनिबार र आइतबार पर्वतीय उडान गरिने जानकारी दिए।
उनका अनुसार यतीले काठमाडौंबाट सातामा दुई दिन र सिमरा आधार भएर हरेक शनिबार एक दिन उडान गर्नेछ।
-1732180391.jpg)
-1732099242.jpg)
