मड्रिड डर्बीमा एट्लेटिकोविरुद्ध रियलको जित, म्यान्चेस्टर डर्बी बराबरीमा
स्पेनिस ला लिगा र इङ्लिस प्रिमियर लिगमा भएका दुई महत्वपूर्ण डर्बी खेल भएका छन्। ला लिगाको मड्रिड डर्बीमा रियल विजयी भएको छ भने इङ्लिस प्रिमियर लिगको म्यान्चेस्टर डर्बी बराबरीमा सकिएको छ।
ला लिगामा रियल मड्रिडले शीर्षस्थानको एट्लेटिको मड्रिडलाई २-० गोलले पराजित गरेको छ। रियलले घरेलु मैदान सान्टियागो बर्नबाउमा कासेमिरोको गोलबाट १५औँ मिनेटमै अग्रता लिएको थियो।
६३औँ मिनेटमा जान ओब्लाकले आत्मघाती गोल गरेपछि रियलले सहज जित हासिल गरेको छ। अंक तालिकामा एट्लेटिको ११ खेलबाट २६ अंकसहित शीर्ष स्थानमा छ। रियल भने १२ खेलबाट २३ अंकसहित तेस्रो स्थानमा छ।
उता इङ्लिस प्रिमियर लिगमा म्यान्चेस्टर युनाइटेड र म्यान्चेस्टर सिटीले गोलरहित बराबरी खेलेका छन्। खेल म्यान्चेस्टर युनाइटेडको घरेलु मैदान वल्ड ट्राफोर्डमा भएको थियो। अंकतालिकामा युनाइटेड २० अंकसहित आठौँ र सिटी १९ अंकसहित नवौँ स्थानमा छन्।
-1732261651.jpg)
-1732259528.jpg)