सदर चिडियाखाना आठ महिनापछि आजबाट खुल्दै, बढीमा डेढ घन्टा मात्र बस्न पाइने
महामारीका रुपमा फैलिएको कोभिड–१९ सङ्क्रमणको जोखिम नेपालमा पनि बढेसँगै गएको ७ चैतदेखि बन्द भएको जावलाखेलस्थित सदर चिडियाखा बिहिबारबाट खुल्ने भएको छ।
कोभिड–१९ सङ्कट व्यवस्थापन केन्द्र (सिसीएमसी) को निर्णयपछि स्वास्थ्य सुरक्षाका आवश्यक मापदण्ड पालना गरी बिहीबारदेखि चिडियाखाना खोल्न लागिएको हो। चिडियाखानामा प्रवेशका लागि स्वास्थ्यका मापदण्ड तयार गरिएको बताउँदै चिडियाखाना व्यवस्थापन प्रमुख डा. चिरञ्जीवीप्रसाद पोखरेलले प्रवेश टिकटको डिजिटलाइजेसन गरिएको र अनलाइनमार्फत पनि लिन सकिने जानकारी दिए।
चिडियाखानामा प्रवेश गर्दा हरेक व्यक्तिले मास्क अनिवार्य लगाउनुपर्ने नियम छ। प्रवेश क्षेत्रमा सेनिटाइजरको व्यवस्था गरिएको छ। भिडभाड व्यवस्थापन गर्न एकपटकमा बढीमा ७०० देखि ८०० व्यक्तिलाई मात्र प्रवेश दिइनेछ। अवलोकर्ताको सङ्ख्या धेरै भए जति व्यक्ति अवलोकनपछि बाहिरिन्छन् त्यति नै सङ्ख्यामा मात्र नयाँ प्रवेश गर्न दिने व्यवस्था गरिएको उनले बताए।
यसैगरी चिडियाखानाभित्र बसेर खान र वन्यजन्तुलाई खुवाउन, छुन नपाउने, एक व्यक्ति बढीमा डेढ घण्टामात्र बस्न पाउने, बालबालिकालाई खेलाउन नपाउनेजस्ता मापदण्ड तयार गरिएको छ। यसअघि झैँ हरेक दिन बिहान १० देखि साँझ ५ बजेसम्म अवलोकनका लागि सञ्चालन हुनेगरी नै मापदण्ड तयार गरिएको छ। हाल चिडियाखानामा ११० प्रजातिका एक हजार ६८ वन्यजन्तु छन्।
अवलोकनका गर्न विदेशीका लागि रु.७५०, सार्क राष्ट्रका पाहुनाका लागि रु.५००, नेपालीलाई रु.१५० र नेपाली विद्यार्थी तथा ज्येष्ठ नागरिकका लागि रु.९० शुल्क निर्धारण गरिएको छ। वार्षिक ११ लाख दर्शक अवलोकन गर्न आउने यहाँ प्रवेश शुल्कबाट नै रु.१५ देखि १६ करोडसम्म संकलन हुने गरेको छ।
अवलोकन गर्न आएका अवलोकनकर्ताबाट प्राप्त शुल्कबाट कर्मचारी व्यवस्थापन र जनावरलाई खानपानको व्यवस्थापन गर्दै आएको । तर, आठ महीनाभन्दा बढी समयदेखि बन्द भएर आम्दानी शून्य भएपछि खर्च व्यवस्थापन गर्न समस्या भएको चिडियाखाना व्यवस्थापन पक्षले जनाएको छ।
तत्कालीन राणा प्रधानमन्त्री जुद्ध शमशेरद्वारा १९८९ सालमा निजीरुपमा स्थापना गरिएको सदर चिडियाखाना २०११ सालदेखि मात्र सर्वसाधारणलाई खुला गरिएको थियो। चिडियाखाना २०५२ सालदेखि राष्ट्रिय प्रकृति संरक्षण कोषद्वारा व्यवस्थापन गरिएको छ।
-1732261651.jpg)
-1732259528.jpg)