डोटीमा जीप दुर्घटना, तीन जनाको मृत्यु, पाँच घाइते
डोटीको बोगटान फुड्सिल गाउँपालिका–७ सेउणीखेत पिउसिया भिरमा जीप दुर्घटना हुँदा तीन जनाको घटनास्थलमै मृत्यु भएको छ भने पाँच जना घाइते भएका छन्।
जिल्ला प्रहरी कार्यालय डोटीका प्रहरी प्रमुख तथा प्रहरी उपरीक्षक जनकराज पाण्डेयका अनुसार दिपायलबाट चवराचौतारातर्फ जाँदै गरेको म १ च ५५० नम्बरको महेन्द्रा जीप गए राति करिब १ बजेतिर दुर्घटनामा परेको हो। दुर्घटनामा परी मृत्यु हुनेमा बोगटन फुड्सिल गाउँपालिका–७ का वडा सचिव मञ्जु त्रिपाठी, उनकी सासू करीब ५५ वर्षकी नाम नखुलेको र केआइसिंह गाउँपालिका–४ का ४० वर्षका हरिनारायण भट्ट छन्।
दुर्घटनामा परी घाइते हुनेमा बोगटान फुड्सिल गाउँपालिका–६ का करिब ३० वर्षका चालक कैलाश बम, कञ्चनपुरको भिमदत्तनगरपालिका–१९ का २८ वर्षीय हेमन्त भट्ट, बोगटान फुड्सिल गाउँपालिका–७ का ४० वर्षीया खेमादेवी गिरी, सोही ठाउँ का २६ वर्षीय टीकाराम गिरी तथा नाम नखुलेका अन्दाजी तीन वर्षका एक बालक छन्।
दुर्घटनामा ज्यान गुमाउने तथा घाइते भएकाहरुको उद्धारका लागि जिल्ला प्रहरी कार्यालय डोटीबाट गए राति नै प्रहरी निरीक्षक रविन्द्र चन्दको नेतृत्वमा टोली खटिएको जिल्ला प्रहरी कार्यालय डोटीले जनाएको छ। जीप सडकबाट करिब २०० मिटर तल खसेको छ। अहिले घटनास्थलबाट घाइतेको उद्धार तथा मृतकको शव सङ्कलन भइरहेको घटनास्थलमा खटिएका प्रहरी निरीक्षक चन्दले जानकारी दिए।
-1732180391.jpg)
-1732099242.jpg)