कमेडियन भारती: आफ्नै मोटोपन र गरीबीमाथि मजाक
भारतीय मनोरञ्जन क्षेत्रमा सानो पर्दा अर्थात् टेलिभिजनको बेग्लै संसार र रौनक छ। सानो पर्दाबाटै उदाएर सेलिब्रिटी भएका थुप्रै अनुहार छन्। त्यसैमध्येकी एक हुन्, कमेडियन भारती सिंह (३६)।
भारतीले 'द ग्रेट इन्डियन लाफ्टर च्यालेन्ज' र 'कमेडी सर्कस' बाट स्टान्डअप कमेडियनका रुपमा पहिचान बनाएकी हुन्। उनले बितेको १२ वर्षमा स्टान्डअप कमेडी क्षेत्रबाटै उँचाइ हासिल गरेकी छिन्। यसै कारण उनलाई 'कमेडी क्वीन' पनि भनिन्छ। पछिल्लो समय उनी सोनी टीभीबाट प्रसारण भइरहेको कमेडी कार्यक्रम 'द कपिल शर्मा शो' मा व्यस्त छिन्।
जसरी उनले सहज रुपमा दर्शकलाई हँसाउँदै नाम र दाम कमाइरहेकी छिन्, उनको आजको सफलता त्यति सजिलो गरी प्राप्त भएको होइन। यसको पछाडि उनले लामो संघर्ष गरेकी छिन्।
भारतीको जन्म पंजाबको अमृतसरमा ३ जुलाई १९८४ मा भएको हो। तर, उनको नेपाल नाता पनि छ। नेपाली मूलका पिता र पञ्जावी आमाकी छोरी हुन् उनी। भारती दुई वर्षको हुँदा उनको पिताको निधन भएको थियो। त्यस बेला उनको आमा केवल २२ वर्षकी थिइन्।
पिताको निधनसँगै परिवारले आर्थिक आडभरोसा गुमायो। भारतीले विभिन्न अन्तर्वार्तामा बताए अनुसार उनको बालापन गरीबीमा बितेको थियो।
आफैंमाथि ठट्टा
भारतीले एक अन्तर्वार्तामा बताएकी थिइन्, कसरी उनले पैसा कमाउन आफ्नो गरीबी र मोटो शरीरको मजाक उडाउन शुरु गरेकी थिइन्। गरीबीले छोपेको जीवनबाट अगाडि बढ्न उनले आफूले जानेको हँसाउने कला प्रस्तुत गर्ने क्रममा दर्शकसामु आफूलाई नै पात्र बनाइन्। जसका क्रममा शारीरिक नापनक्शामा टीकाटिप्पणी गर्ने र अभावको टीठलाग्दो पक्षमा घोचपेच रुचाउने समाजमा उनको त्यही प्रस्तुति रुचाउँदै गयो।
जीटीभीमा आउने कार्यक्रम 'जज्बात' मा अन्तर्वार्ता दिने क्रममा उनले विगतमा आफ्नो परिवारको गरीबी र संघर्षपूर्ण बालापनबारे विस्तारमा बताएकी थिइन्। उनले आफ्नी आमाले घर चलाउन कपडा सिलाउने गरेको र सिलाइ मेशिनको आवाजले आज पनि त्यो कठिन विगत सम्झाउने गरेको बताएकी थिइन्। उक्त कार्यक्रममा आफ्नो जन्म संयोगले भएको पनि बताएकी थिइन्। "मभन्दा माथि एक छोरा र छोरी पहिले नै थिए। यसैले मलाई नजन्माउन आमाले हरसम्भव प्रयास गर्नुभएको थियो। तर, मेरो जन्म लेखिएकै रहेछ", उनले भनेकी थिइन्।
भारतीका अनुसार, पिताको निधन भएपछि बालापनमा उनले धेरै दु:खसाथ हुर्किइन्। उनकी आमा कम्बल फ्याक्ट्रीमा काम गर्थिन्। त्यहाँ काम सकिएपछि दुपट्टामा गोटी भर्ने काम पनि गर्थिन्। "हरेक चाडपर्वमा हामी रुन्थ्यौं, किनकि हामीसँग चाड मनाउने पैसा हुँदैनथ्यो। त्यो अभाव देख्दै हुर्केकाले म उमेरभन्दा अगाडि नै ठूली भएँ", उनले अन्तर्वार्तामा भनेकी थिइन्।
त्यो दु:ख पार गरेर आज भारती अरुलाई हँसाउँदै सफलताको भर्याङ उक्लिरहेकी छिन्। जुन कमेडी प्रस्तुतिहरुमा उनी आफ्नो मोटोपनलाई हिच्किचाहटविना ठट्टाको विषय बनाइरहेकी हुन्छिन्।
अमृतसरमा कलेज पढ्ने बेलादेखि नै उनी आजका चर्चित स्टान्डअप कमेडियन कपिल शर्मालाई चिन्थिन्। कपिल पनि अमृतसरकै हुन्। यी दुवैको सफलताको सफर लगभग उस्तै छ।
कमेडी करिअर
भारतीले रियालिटी शो 'द ग्रेट इन्डियन लाफ्टर च्यालेन्ज' बाट आफ्नो करिअर शुरु गरेकी थिइन्। उनी उक्त शो को सेकेन्ड रनर अप भएकी थिइन्। यसपछि उनले 'कमेडी सर्कस ३ का तडका' मा भाग लिइन्। यसपछि प्राय: सबै कमेडी शोमा देखिंदै उनले लोकप्रियता कमाउँदै गइन्।
उनले 'कमेडी सर्कस महासंग्राम', 'कमेडी सर्कस के सुपर स्टार', 'कमेडी सर्कस का जादू', 'कमेडी सर्कस के तानसेन', 'कमेडी सर्कस का नया दौर', 'कहानी कमेडी सर्कस की' र 'कमेडी सर्कस के अजूबे' जस्ता कैयौं टीभी शोमा सहभागिता जनाइन्। यसबाहेक उनी 'नच बलिए', 'झलक दिखला जा सिजन ५' र 'बिग बोस' मा पनि देखिइन्।
भारतीले 'इन्डियाज गट ट्यालेन्ट' र 'इन्डियाज बेस्ट डान्सर' जस्ता शो को होस्ट गरिन् भने कमेडी दंगल शोमा निर्णायकको भूमिकामा पनि देखिइन्।
'खतरों के खिलाडी' शो का कैयौं सिजनमा उनी अतिथिको रुपमा सहभागी भइन्। कपिल शर्मा शोको पुरानो सिजनमा पनि उनले बेलाबेला आफ्नो हास्य जादू प्रस्तुत गरिन्। सानी बालिका 'लल्ली' को चरित्रमा उनको प्रस्तुति निकै रुचाइयो।
आम रुपमा पुरुष कलाकारको वर्चश्व रहेको स्टन्डअप कमेडी क्षेत्रमा भारतीले आफ्नो अलग र सफल पहिचान स्थापित गरेकी छिन्। उनले 'खिलाडी ७८६' र 'सनम रे' लगायत केही हिन्दी फिल्मका साथै पंजाबी फिल्ममा पनि काम गरेकी छिन्।
भारतीले सन् २०१७ डिसेम्बरमा मनोरञ्जन दुनियाँकै हर्ष लिंबाचियासँग विवाह गरिन्। हर्ष टेलिभिजन कार्यक्रमका स्क्रिप्ट राइटर, प्रोड्यूसर र होस्ट हुन्।
भारती सिंह पति हर्ष लिंबाचियासँग ।
भारती र हर्षको भेट कमेडी सर्कस शोको दौरान भएको थियो, जुन बेला दुवै आफ्नो पहिचान बनाउन संघर्षरत थिए। हर्ष उक्त कार्यक्रमका स्क्रिप्ट राइटर थिए।
र ड्रग्स प्रकरण
यसैबीच, पछिल्लो समय भारतीय मनोरञ्जन क्षेत्रलाई तरंगित बनाएको ड्रग्स प्रकरणमा भारतीको नाम पनि मुछिन पुगेको छ।
बलिउड अभिनेता सुशान्त सिंह राजपूतको मृत्यु घटनामा ड्रग्सको विषय बाहिर आएपछि भारतको नारकोटिक्स कन्ट्रोल ब्यूरो (एनसीबी) ले फिल्म र टीभी जगतका कैयौं हस्तीसँग सोधपुछ गरेको छ भने कतिपयको घरमा छापा समेत हानेको छ। यसै क्रममा एनसीबीले शनिबार भारती र उनका पति हर्षलाई पक्राउ गर्यो।
बीबीसी हिन्दीका अनुसार, एनसीबीले भारतीयको मुम्बईस्थित घर र प्रोडक्शन हाउसमा छापा मार्दा ८६.५ ग्राम गाँजा समेत भेटिएको जनाएको छ। एनसीबीका अधिकारीहरुले भारती र हर्ष दुवैले गाँजा सेवन गर्ने गरेको स्वीकारेको बताएका छन्। - बीबीसी हिन्दी
