उद्योग वाणिज्य महासंघ र ब्रिटिश काउन्सिलबीच सहकार्य हुने
नेपाल उद्योग वाणिज्य महासंघ र ब्रिटिश काउन्सिलबीच प्राविधिक शिक्षा तथा व्यावसायिक तालिम सम्बन्धी कार्यक्रममा सहकार्य गर्ने सम्झौता भएको छ। महासंघले ब्रिटिश काउन्सिलसँग गएको २७ कात्तिकमा ‘इम्प्लोयर लिड लेबर मार्केट सेक्रेटिअरिस्ट (ईएलएमएस)’ परियोजना कार्यान्वयन गर्ने सम्बन्धी सम्झौता पत्रमा हस्ताक्षर भएको बताएको छ।
महासंघकी अध्यक्ष भवानी राणाले १७ करोड ९० लाख ११ हजार ७३३ रूपैयाँ बराबरको बजेटमा १४ महीने कार्यक्रम लागू हुने बताइन्। परियोजनामार्फत् व्यावसायिक वर्गीकरण मानकको विकास तथा श्रम बजार सूचना प्रणालीको विकास गरिने छ। यो कार्यक्रम पर्यटन क्षेत्र, निर्माण क्षेत्र र कृषि क्षेत्रमा कार्यान्वयन हुने पनि अध्यक्ष राणाले बताइन्।
परियोजनाले मुलुकको औद्योगिक विकासमा सहयोग पुर्याउने, श्रम बजार सम्बन्धी सूचना प्रणालीलाई व्यवस्थित र भरपर्दो बनाउने, उद्योग प्रतिष्ठानहरूको लागि आवश्यक दक्ष जनशक्ति उपलब्ध गराउने प्रत्याभुति दिलाउने, रोजगारी सृजना गर्ने, श्रमबजार सम्बन्धी तथ्याङ्कको विकास गर्ने कार्यमा परियोजना कोशेढुंगा हुने अध्यक्ष राणाको विश्वास छ।
यो परियोजनाबाट श्रम बजारसँग सम्बन्धित सरकारको नीति निर्माण एवं कार्यक्रममा सघाउ पुग्नुको साथै उद्योग व्यवसाय क्षेत्रका लागि आवश्यक दक्ष जनशक्ति उत्पादनमा समेत मद्दत गर्ने छ। परियोजनाका साझेदार व्यवसायिक संस्थाहरूमा नेपाल उद्योग परिसंघ, घरेलु तथा साना उद्योग महासंघ, होटल संघ नेपाल र नेपाल निर्माण व्यवसायी महासंघ रहेका छन्।
-1732353496.jpg)
