कोरोनाका कारण भारतमा थप आठ नेपालीको निधन
कोरोनाभाइरसका कारण विदेशमा थप आठजना नेपालीको निधन भएको छ। गैरआवासीय नेपाली सङ्घका अनुसार, यो साता भारतको महाराष्ट्र र चेन्नईमा कोरोना भाइरसका कारण आठजना नेपाली ज्यान गएको हो।
गैरआवासीय नेपाली सङ्घको स्वास्थ्य समितिका अनुसार विदेशमा शनिबार साँझसम्म कोरोनाका कारण निधन हुने नेपाली सङ्ख्या २९३ जना पुगेको छ। सङ्घका अनुसार विश्वभर ४४ देशमा अनुमानित ४५ हजार ४३९ जना नेपालीमा कोरोना सङ्क्रमण देखिएको छ। तीमध्ये अनुमानित ४१ हजार ४३९ जना कोरोना सङ्क्रमणमुक्त भएका छन्। विदेशमा कोरोनामुक्त हुने नेपालीको सङ्ख्या ९१ प्रतिशत रहेको छ।
सङ्घको स्वास्थ्य समितिका संयोजक डा. सञ्जीव सापकोटाका अनुसार, युके, स्पेन, अष्ट्रिया, जर्मनी, भारत, युएई, कतार र साउदी अरबमा रहेका नेपालीमा थप कोरोना सङ्क्रमण देखिएको छ।
यो सातासम्म नेपालमा मात्र दुई लाख ६ हजार ३५३ जना कोरोना भाइरसबाट सङ्क्रमित भएका छन् भने तीमध्ये एक लाख ६८ हजार १२९ जना कोरोनामुक्त भएका छन्। नेपालमा कोरोना सङ्क्रमणबाट मुक्त हुनेहरूको सङ्ख्या ८१ दशमलव पाँच प्रतिशत रहेको छ। शनिबार साँझसम्म नेपालमा एक हजार २१५ जनाको कोरोना सङ्क्रमणका कारण ज्यान गएको छ।
एनआरएनएको स्वास्थ्य समितिले चाडपर्वका बेला हुने स–साना भेटघाटहरू कम गर्न आग्रह गरेको छ। समितिका संयोजक डा. सापकोटाले भौतिक दूरी कायम राख्दै चाडपर्व मनाउन सबैलाई आग्रह गरेका छन्।
-1732180391.jpg)
-1732099242.jpg)