‘क्याम्प टु’ पुगे आइफल डाक्टर, मौसम अनुकूल
सर्वोच्च शिखर सगरमाथा आरोहणका लागि बाटो पहिल्याउँदै आइसफल डाक्टरको समूह सगरमाथाको दोस्रो शिविर ‘क्याम्प–२’ मा पुगेको छ ।
सगरमाथाको ‘क्याम्प– टु' । तस्वीर स्रोतः इयान टेलर ट्रेकिङ
वसन्त ऋतुको यो यामको सगरमाथा आरोहणका लागि डोरी टाँग्न आइसफल डाक्टर सगरमाथाको चुचुरोतर्फ लागेका हुन् । सगरमाथा आरोहणका लागि क्याम्प–२ सम्म बाटो बनाउने काम सम्पन्न भएको सगरमाथा प्रदूषण नियन्त्रण समिति (एसपीसीसी) का अध्यक्ष आङदोर्जे शेर्पाले जानकारी दिए ।
सगरमाथाको दोस्रो शिविरसम्म हिमनदी, हिमखाल्डा तथा जोखिमपूर्ण ठाउँ प्रशस्त रहने भएकाले बाटो बनाउनु चुनौतीपूर्ण मानिन्छ । सगरमाथा आरोहणमा भन्दा आधार शिविरदेखि क्याम्प–१ र क्याम्प–२ पुग्नु जोखिम मानिने आरोही बताउँछन् । आइसफल डाक्टर आठजनाको समूहमा खटिएका छन् ।
आइसफल डाक्टरको समूहले डोरी टाँगिसकेपछि ६ जनाले तलमाथि गरेर बाटो मर्मतको काम गर्छन् भने दुईजना दोस्रो शिविरमै बसेर निरीक्षणको काम गर्ने समितिले जनाएको छ । यो क्रम आरोहण शुरु हुने अवधिसम्म जारी रहन्छ ।
आइसफल डाक्टरका अनुसार विगतमा भन्दा यसपटक सगरमाथा आरोहणका लागि बाटो राम्रो भएको छ । अनुकूल मौसमले आरोहण उत्साहजनक हुने अपेक्षा गरिएको एसपीसीसीका अध्यक्ष शेर्पाले उल्लेख गरे ।
संस्थाका कार्यक्रम अधिकृत कपिन्द्र राईले आइसफल डाक्टरको टोलीले दोस्रो शिविरसम्म सफलतापूर्वक बाटो बनाइसकेको बताए । समितिले प्रत्येक वर्ष सगरमाथाको क्याप्प–२ सम्म बाटो बनाउने जिम्मा पाएको छ ।
दोस्रो शिविरदेखि शिखरसम्मको बाटो बनाउने काम एक्सपिडिसन अपरेटर एशोसिएशनले गर्दै आएको छ । एशोसिएशनका अध्यक्ष डम्बर पराजुलीले पाँचदेखि सात दिनभित्र आइसफल डाक्टर (आठजना) को समूह सगरमाथाको दोस्रो शिविरदेखि चुचुरोसम्म डोरी टाँग्न जानेछन् ।
अहिले बाटो खुलाउनका लागि आवश्यक औजार, डोरीलगायत सामग्री हेलिकोप्टरमार्फत दोस्रो शिविर पु¥याइएको छ । आइसफल डाक्टरको समूह सगरमाथाको आधार शिविरदेखि आरोहण गर्दै माथिसम्म पुग्नुपर्छ ।
“सगरमाथाको खुम्बु आइसफलसम्म अर्थात दोस्रो शिविरसम्म बाटो बनिसकेको छ । अहिले शेर्पा तल माथि गरिरहेका छन् । ८० देखि ९० भारी सामानमाथि चुचुरोसम्म लैजानुपर्ने हुन्छ । ‘‘डोरी, स्नोवार, क्याराबिन आइस–क्रु आदि सामान लैजानुपर्छ, आवश्यक जनशक्तिको व्यवस्था गरेर बाटो खुलाउँछौँ,” अध्यक्ष पराजुलीले भने ।
सामान्यतया मे महीनाको १२ देखि १८ तारिखसम्म दोस्रो शिविरदेखि चुचुरोमा डोरी टाँगिन्छ । यो कामका लागि करीब रु एक करोड खर्च लाग्ने गर्दछ । यसको ४० प्रतिशत सामग्री ढुवानीमै खर्च हुन्छ ।
कीर्तिमानी आरोही फुर्वा तेञ्जिन शेर्पाको अनुभवमा सगरमाथाको बाटो बनाउने काम निकै चुनौतीपूर्ण मानिन्छ । खासगरी दोस्रो शिविरसम्म बाटो धेरै खतरा हुन्छ । उक्त क्षेत्रमा चाँडो चाँडो हिम खाल्डा तथा दरार उत्पन्न हुने भएकाले आरोहण जोखिम हुन्छ ।
सगरमाथा आरोहणको समय सामान्यतः ७५ दिनको हुन्छ । त्यससमध्ये ५० दिन हिमाल आरोहणमै बित्छ । समिटका लागि गएका सबै आरोही मे २९ मा आधार शिविर झरिसक्नुपर्ने हुन्छ ।
डिमर एक्सपिडिसनका अध्यक्ष समेत रहेका शेर्पाले यो याममा ‘प्रथम चिनियाँ महिला सगरमाथा आरोहण २०१९’ र एक नेपाली गरी दुई आरोही समूह सगरमाथा आरोहणमा पठाएको छ ।
पर्यटन विभागका अनुसार वसन्तु ऋतुको यो याममा सगरमाथासहित २० हिमाल आरोहणका लागि हालसम्म ७२ आरोही समूहका ६३६ आरोहीले आरोहण अनुमति पाएका छन् । यीमध्यै सबैभन्दा बढी सगरमाथा आरोहणका लागि २८ आरोही समूह छन् ।
हिमाल आरोहणबाट बिहीबारसम्म रु ४१ करोड ४७ लाख ६८ हजार १४५ रोयल्टी संकलन भएको विभागको पर्वतारोहण शाखाले जनाएको छ । –सिवी अधिकारी
-1732353496.jpg)
