तालिबानले गर्याे सशस्त्र संघर्ष चर्काउने घोषणा
अफगानिस्तानमा लामो समयदेखि संघर्षरत तालिबान विद्रोही समूहले संयुक्तराज्य अमेरिकासँग वार्ता प्रक्रियामा रहेपनि सशस्त्र संघर्षलाई अझ तीव्र बनाउने शुक्रबार घोषणा गरेको छ ।
तस्वीर ः इएफआर आेआरजी
अंग्र्रेजी समेत पाँच भाषामा प्रकाशित लामो वक्तव्यमा तालिबान विद्रोहीले अफगानिस्तानमा विदेशी फौज रहेसम्म संघर्षलाई निरन्तरता दिइने बताएको छ ।
हुनत, तालिबानले यस्तो घोषणा हरेक वर्ष गरिरहेको छ । हिउँदका कठिन दिनमा पनि तालिबानी आक्रमण रोकिएका छैनन् । तालिबानले दिनहुँजसो अफगान सुरक्षाफौज र अफगानिस्तानमा तैनाथ नेटो फौजमाथि आक्रमण गरिरहेको छ ।
तालिबानी आक्रमणबाट सुरक्षाकर्मी, लडाकू र सर्वसाधारणको मृत्यु हुनेक्रम घट्नुको साटो पछिल्ला वर्षमा अझ बढेको छ । पछिल्लो समय, तालिबानले बाघ्रामस्थित अमेरिकी हवाई अखाडामा गत सोमबार गरेको आत्मघाती आक्रमणमा तीनजना अमेरिकी सैनिकको मृत्यु भएको थियो ।
विभिन्न अध्ययनले अफगानिस्तानको आधाभन्दा बढी भूभागमा तालिबान समूहले कब्जा गरेको देखाएका छन् । मूलतः अफगानिस्तानमा अमेरिकी अतिक्रमणका विरुद्ध विगत १७ वर्षदेखि तालिबान र इस्लामिक स्टेट्स समूहले सशस्त्र संघर्ष गरिरहेको छ ।
शुक्रबारको घोषणामा तालिबानले आफ्ना लडाकूहरूलाई पूर्ण इमानदारी र तालिबान कमाण्ड संरचना बमोजिम आक्रामक कारबाही अघि बढाउन निर्देशन दिएको छ । घोषणामा नागरिक हताहत रोक्न भरमग्दुर प्रयास गर्न लडाकूहरूलाई निर्देश दिइएको छ ।
यसै वर्षको शुरुमा प्रकाशित राष्ट्रसंघको वार्षिक प्रतिवेदन अनुसार गत वर्ष सन् २०१८ मा ठूलो संख्यामा सर्वसाधारणको मृत्यु भएको छ । नागरिकको हत्या हुनुमा मुख्यतः तालिबानी लडाकू र अरु विद्रोही दोषी देखिएका छन् ।
अमेरिकी हवाई आक्रमणबाट पनि ठूलो संख्यामा नागरिक हताहत भएको पाइएको छ । अमेरिकी हवाई आक्रमण खासगरी प्रत्यक्ष लडाइँमा संलग्न अफगानी फौजको सहयोगका लागि हुने गरेका छन् ।
तैपनि, कतारमा अर्को सातादेखि अफगानी समूहबीच वार्ता शुरु हुँदैछ । कतारमा तालिबानको कार्यालय समेत रहेको छ ।
यता काबुलमा, सरकार विरोधी पक्षसँग शान्ति वार्ता गर्न एक वर्षअघि स्थापना गरिएको अफगान उच्च शान्ति परिषद्ले तालिबानको पछिल्लो वक्तव्यप्रति निन्दा गरेको छ ।
अफगान युद्धको शान्तिपूर्ण समाधानमा विद्रोहीहरू इमानदार रहेकामा यस वक्तव्यले शंका उब्जाएको परिषद्ले जनाएको छ ।
परिषद्का उपप्रमुख अट्टा–उ–रहमान सलेमले भन्नुभयो, ‘उनीहरूले युद्ध नै चाहेको देखिन्छ । उनीहरूका हरेक दिनका क्रियाकलापले यसैलाई पुष्टि गरिरहेको छ ।’
अमेरिकी अफगान शान्तिदूत जाल्मे खलिलजादले तालिबानसँग युद्धविराम गर्न र काबुल सरकारसँग वार्ताका लागि आग्रह गरिरहेका छन्, तर विद्रोहीले यी दुवै प्रस्ताव अस्वीकार गरेका छन् ।
तालिबानले अफगान सरकारसँग वार्ता नगर्ने बताउँदै आएको छ । कतारमा वार्ताका लागि आउने अफगान टोलीलाई तालिबानले सरकारी प्रतिनिधि नभई सर्वसाधारण अफगान नागरिक ठान्ने गरेको छ ।
-1732353496.jpg)
