अमेरिकामा राष्ट्रपति चयनका लागि मतदान शुरू, करिब सात करोड मतदान हुलाकमार्फत्
अमेरिकामा मंगलबार नयाँ राष्ट्रपति चयनका लागि मतदान शुरू भएको छ। अमेरिकाको न्यु ह्याम्सायरको डिक्सभील नोच र मिल्सफील्डबाट मतदान शुरु गर्ने परम्परा अनुसार त्यहाँको मतदान शुरू भएको अमेरिकी सञ्चार माध्यमहरूले उल्लेख गरेका छन्।
नेपाली समय अनुसार मंगलबार बेलुकाबाट मतदान शुरु हुने भएको हो। अमेरिकाको स्थानीय समय अनुसार मंगलबार बिहान स्थान अनुसार ६ बजेदेखि ८ बजेसम्ममा मतदान शुरु भएको छ।
प्रत्यक्ष मतदान मंगलबार हुने भएपनि सोमबारसम्म अन्य माध्यमबाट झण्डै सात करोड अमेरिकी नागरिकहरूले मतदान गरिसकेको अधिकारीहरूले जनाएका छन्।
चुनावको एक दिन बाँकी छँदा ६.९५ करोड अमेरिकीले हुलाकमार्फत् अथवा पहिल्यै मतदान गर्न पाउने व्यवस्थाअन्तर्गत मत दिइसकेको जनाइएको छ। अमेरिकामा हरेक निर्वाचनमा हुलाकमार्फत मतदान गर्न पाइन्छ।
सन् २०१६ को राष्ट्रपतीय निर्वाचनमा तीन करोड ३० लाख अमेरिकीले हुलाकमार्फत् मतदान गरेकोमा यस पटक कोरोनाभाइरस महामारीका कारण आठ करोड २० लाख मानिसलाई हुलाकमार्फत् मतदान गर्न आग्रह गरिएको थियो।
राष्ट्रपतिका लागि बर्तमान राष्ट्रपति तथा रिपब्लीकनका तर्फबाट उम्मेदबार डोनाल्ड ट्रम्प र पूर्व उपराष्ट्रपति तथा डेमोक्रेटिक पार्टीका तर्फबाट उम्मेदबार जो वाइडेन बीच कडा प्रतिस्पर्धा भइरहेको छ। प्रतिस्पर्धीमध्ये ट्रम्प ७४ वर्ष र वाइडेन ७८ वर्षका हुन्।
चुनावी अभियानमा वाइडेनले ट्रम्पको कार्यकालमा भएका गल्ती र कोरोना भाइरस रोकथाम र नियन्त्रणमा भएका कमजोरीलाई आफ्नो प्रमुख मुद्दा बनाएका छन् भने ट्रम्प आफूमाथि लागेको आरोपहरूको प्रतिवाद गर्दै आक्रामक रूपमा प्रस्तुत भएका थिए। चुनावी सर्वेक्षणहरूमा डेमोक्रेटिक पार्टीका उम्मेदवार वाइडेनलाई नै अगाडि देखाइएको छ भने ट्रम्पप्रति धेरैको असन्तुष्टि रहेको र भरोसा टुटेको दावी गरिएको छ।
अमेरिकी राष्ट्रपतिको काम कारवाहीबाट अमेरिका र विदेशमा रहेका धेरै मानिसको जीवनमा प्रत्यक्ष असर पर्ने भएकाले यस निर्वाचनलाई महत्वका साथ हेर्ने गरिन्छ। अमेरिकामा रिपब्लिकनहरूलाई परम्परावादी र डेमोक्रयाटहरूलाई उदारवादी धारको रुपमा लिने गरिन्छ।
अमेरिकामा कुल ५३८ वटा इलेक्ट्रोरल कलेज मतमध्ये २७० भन्दा बढी मत प्राप्त गर्ने उम्मेदवारलाई विजयी भएको मानिन्छ। सामान्य मतदाताले राज्यस्तरीय प्रतिस्पर्धाका लागि मतदान गर्ने गर्छन् र उनीहरूले छानेको व्यक्तिले राष्ट्रपति चयन गर्नेछन्।
यही व्यवस्थाका कारण कतिपय बेला देशव्यापी रूपमा सबैभन्दा धेरै मत ल्याउने उम्मेदवार पनि इलेक्ट्रोरल कलेजमा थोरै मत प्राप्त भएर पराजित हुने गरेका छन्।
सन् २०१६ को राष्ट्रपतीय निर्वाचनमा पनि मतदानमा हिलरी क्लिन्टनले धेरै मत पाएपनि इलेक्ट्रोरल कलेजको मत डोनल्ड ट्रम्पले धेरै पाएर राष्ट्रपतिमा निर्वाचित भएका थिए। त्यतिबेला अधिकांश सर्वेक्षण र सञ्चार माध्यमहरूले हिलारी विजयी हुने प्रक्षेपण गरेका थिए।
अमेरिकामा हरेक चारचार बर्षको नोभेम्बरमा निर्वाचन हुने गर्दछ। त्यस निर्वाचनबाट निर्वाचित नयाँ राष्ट्रपतिले औपचारिक रूपमा २० जनवरीमा शपथ ग्रहण गर्दै ह्वाईट हाउस प्रवेश गर्ने परम्परा रहेको छ।
-1732353496.jpg)
-1732261651.jpg)