दुई महीनासम्म पनि भेटिएन बाढीमा बेपत्ता १५ जनाको शव
बागलुङको ढोरपाटन नगरपालिका-९ बोबाङमा बाढीपहिरोमा परेका १५ जनाको शव घटना भएको दुई महीना बितिसक्दा पनि भेटिएको छैन। बाढीले बितण्डा मच्चाएको सोमबार दुई महीना पुगेको छ। १७ भदौमा आएको बाढीपहिरोमा परी बेपत्ता ३८ जनामध्ये १५ जनाको दुई महीनासम्म पनि केही पत्तो लागेको छैन। २२ जनाको शव भने यसअघि नै भेटिइसकेको छ।
लामो समयसम्म खोजी गर्दासमेत बेपत्ताको अवस्था पत्ता नलागेपछि प्रहरीले जिल्ला प्रशासन कार्यालयमार्फत गृहमन्त्रालय हुँदै देशभर उनीहरूको हुलियासहितको जानकारी पठाएको छ। खोला किनार र बाढीपहिरो प्रभावित क्षेत्र आसपास सक्रिय खोजी भने रोकिएको छ।
“हामीले खोजी रोकेका छैनौँ, खोज्ने प्रक्रिया बद्लिएको छ”, प्रहरी उपरीक्षक लोकेन्द्र श्रेष्ठले भने, “सबै जानकारीसहितको विवरण देशभर पठाएका छौँ, सबैको अवस्था अज्ञात छ।”
जिल्ला प्रशासन कार्यालयले गृहमन्त्रालयको निर्देशनमा सबै बेपत्ताका परिवारलाई मृतकसरहको राहत उपलब्ध गराएको छ। भुजीखोलामा आएको बाढीपहिरोका कारण प्रभावित क्षेत्रको पुनःनिर्माणका लागि प्रक्रिया शुरू भएको छ। बाढीपहिरोमा परी ढोरपाटन नगरपालिका–९ बोबाङका ३१ वर्षीय जीतबहादुर घर्ती मगर, ९ वर्षीय शेसन विक, ४ वर्षीय रवि विक, २२ वर्षीय मनकुमारी विक, २१ वर्षीया टेकमाया विक, १० महीनाकी तिर्सना विक र १५ वर्षीया मनिषा विक बेपत्ता छन्।
त्यस्तै, सोही ठाउँकै ५५ वर्षीया कौशिला पुल, २६ वर्षीय विलास पुन, ५५ वर्षीया तुलमती घर्ती, ५ वर्षीय विराज विक, १० महीने शिशु उमिसा विक, तीन वर्षीया करली पुन, आठ वर्षीय मोहन विक र १२ वर्षीया समुन्द्र विक बेपत्ता छन्।
बेपत्तामध्ये अधिकांश एकाघरका परिवार छन्। बाढीपहिरोमा बेपत्ता भएका ३८ जनामध्ये २२ जनाको शव फेला परेको थियो भने एक जना सकुशल भेटिएका थिए। बाढीपहिरोका कारण ढोरपाटन नगरपालिका–६, ७, ८ र ९ का १३० घरमा क्षति पुगेको तथ्याङ्क नगरपालिकासँग छ।
-1732180391.jpg)
