भक्तपुरमा कोरोना संक्रमण र मृत्युदर बढ्दो, मृत्युदर १.२३ प्रतिशत पुग्यो
भक्तपुरमा कोरोनाभाइरस संक्रमण र मृत्युदर दैनिक बढ्दै गइरहेको छ। जिल्लामा शुक्रबार बिहानसम्ममा संक्रमितको सङ्ख्या पाँच हजार ५०० नाघेको छ।
जिल्ला स्वास्थ्य कार्यालय भक्तपुरका अनुसार जिल्लामा तीन हजार १७५ पुरुष र दुई हजार ४२१ महिला गरी संक्रमितको सङ्ख्या पाँच हजार ५९६ जना पुगेको छ। त्यसैगरी कोरोनाभाइरस सङ्क्रमणका कारण मृत्यु हुनेको सङ्ख्या ६९ पुगेको छ।
बुधबार र बिहीबार मात्रै भक्तपुरमा पाँचजना संक्रमितको ज्यान गएको छ। छाला र मिर्गौला रोगको बिरामी कैलाली गौरीगंगा नगरपालिका–४ की २८ वर्षीया महिलाको कोरोना सङ्क्रमणका कारण बिहीबार साँझ भक्तपुर अस्पतालमा उपचारको क्रममा मृत्यु भएको अस्पतालकी मेडिकल सुपरिटेन्डेण्ट डा. सुमित्रा गौतमले जानकारी बताइन्।
कोरोना सङ्क्रमण पुष्टिपछि ३ कात्तिकमा भक्तपुर अस्पताल भर्ना भई उपचार गराइरहेकी महिला र भक्तपुर नगरपालिका–१ का ७९ वर्षीय पुरुषको पनि कोरोना सङ्क्रमणका कारण बिहीबार साँझ मृत्यु भएको हो। स्वास्थ्य समस्याका कारण २३ असोजमा भर्ना भएका पुरुषमा कोरोना सङ्क्रमण पुष्टि भई उपचारकै क्रममा मृत्यु भएको डा. गौतमले बताइन्।
त्यस्तै ४ कात्तिकमा कोरोना सङ्क्रमण पुष्टि भई करुणा अस्पताल बूढानीलकण्ठमा उपचाररत मधुमेहका बिरामी भक्तपुर नगरपालिका–३ बाराहीस्थानका ५६ वर्षीय पुरुषको पनि बिहीबार नै मृत्यु भएको स्वास्थ्य कार्यालय भक्तपुरका प्रमुख कृष्ण मिजारले बताए। भक्तपुरमा कोरोना भाइरस सङ्क्रमणका कारण मृत्यु हुने दर समग्र नेपालको दोब्बर भन्दा बढी रहेको उनले बताए।
कोरोना सङ्क्रमणबाट नेपालको समग्र मृत्युदर ०.६ प्रतिशत रहेकोमा भक्तपुरमा भने बिहीबारसम्म सङ्क्रमणबाट मृत्यु हुने दर १.२३ प्रतिशत रहेको मिजारले बताए।
त्यसैगरी, कोरोना भाइरस सङ्क्रमितको निको हुने दर भने भक्तपुरमा ६७.३३ प्रतिशत छ। बिहीबारसम्म दुई हजार ८१ पुरुष र एक हजार ६१८ महिला गरी तीन हजार ६९९ सङ्क्रमित निको भएर घर गएको कार्यालय प्रमुख मिजारले बताए।
भक्तपुरमा हाल एकहजार ४७ पुरुष र ७८१ महिला गरी एक हजार ८२८ सक्रिय सङ्क्रमित रहेका छन्। सक्रिय सङ्क्रमितमध्ये २२२ पुरुष १३१ महिला गरी ३५३ अस्पताललगायतको आइसोलेसनमा तथा ९७५ पुरुष र ७७२ महिला गरी एक हजार ७४७ अर्थात् ८३.१९ प्रतिशत होम आइसोलेसनमा रहेको कार्यालय प्रमुख मिजारले बताए।
-1732180391.jpg)
