लगनखेलका अधिकांश मासु पसल मापदण्डविपरीत, सात दिनभित्र सुधार गर्न निर्देशन
ललितपुरको लगनखेलका अधिकांश मासु पसल मापदण्डविपरीत भेटिएका छन्। ललितपुर महानगरपालिकाका प्रतिनिधिले शनिबार गरेको बजार अनुगमनका क्रममा ती पसल मापदण्डविपरीत पाइएको हो।
महानगरपालिकाका पशु चिकित्सक राजेन्द्र विष्टले लगनखेलका सात मासु पसलको अनुगमन गर्दा अधिकांश पसलले बिक्रीस्थल सफा नराखेको, मासु राख्ने फ्रिजहरु फोहर भएका र गन्हाउने मासु पनि भेटिएको बताए। उनले भने, “हामीले व्यापारीलाई सात दिनभित्र यी पसल सफा सुग्घर गरेर सञ्चालन गर्न निर्देशन दिएका छौँ।”
उपप्रमुख गीता सत्यालले कोरोना महामारीको अवस्थामा बजारहरु कसरी सञ्चालन भइरहेका छन् भनेर निरन्तर अनुगमन हुने बताइन्। उपभोक्ता र व्यापारीले भौतिक दूरी कायम गरे नगरेको तथा गुणस्तरीय सामग्री बिक्री भए नभएको निरन्तर छड्के अनुगमन हुने पनि उनले बताइन्।
महानगरपालिकाका सामान्य प्रशासन महाशाखा प्रमुख श्रीभद्र ओझाले उपभोक्ताले उचित र सुलभ मूल्यमा गुणस्तरीय सामग्री बजारबाट प्राप्त गर्न सकेका छन् या छैनन् भन्ने बुझ्न अनुगमन थालेको बताए। उनले भने, “हामीले दैनिक बजार अनुगमन गरी मापदण्डअनुसारका सामग्री बिक्री नगर्ने र स्थानीय तहका साथै सम्बन्धित निकायमा दर्ता पनि नगरी बजार सञ्चालन गर्नेलाई कानूनी कारवाहीको दायरामा ल्याउने भएका छौँ।”
यसैगरी महानगरपालिकाको अनुगमन टोलीले कतिपय ठाउँमा दर्ता नगरी व्यवसाय सञ्चालन गरेको, मापदण्ड पूरा नगरी दैनिक उपभोग्य सामग्री बिक्री वितरण भइरहेको, व्यवसायीले हरेक सामग्री किनेका र बेचेका विवरण पारदर्शी तरिकाले नराखेको र भ्याट बिल तिरेर सामान नकिनेको समेत फेला पारेको छ। अनुगमन टोलीका एक सदस्यले यस्ता व्यवसायीलाई तुरुन्तै प्रक्रिया पु¥याएर सही तरिकाले व्यवसाय अघि बढाउन आग्रह गरेको जानकारी दिए।
-1732180391.jpg)
