कोरियामा डढेलाेबाट एकको मृत्यु, पाँच शहर प्रभावित
दक्षिण कोरिया सरकारले देशको उत्तरपूर्वी क्षेत्रको जंगलमा बिहीबार राति सल्किएको डढेलोका कारण तटीय क्षेत्रका पाँचवटा शहर प्रभावित भएपछि शुक्रबार राष्ट्रिय प्रकोपको घोषणा गरेको छ ।
तस्वीर : रासस\एएफपी
डढेलोका कारण एकजनाको मृत्यु हुनुका साथै ११ जना घाइते भएको जनाइएको छ ।
राष्ट्रिय राजधानी सोलबाट करिब २ सय १० किलोमिटर उत्तरपश्चिममा रहेको जंगलमा स्थानीय समयानुसार बिहीबार राति सो आगलागी शुरु भएको थियो ।
तीव्र हावाहुरीका कारण जंगलको डढेलोले करिब दुई सय ५० हेक्टर वन क्षेत्र ध्वस्त भएको छ भने एक सय २५ वटा घर क्षतिग्रस्त भएका छन् ।
हजारौँ स्थानीयबासीलाई रातारात सकुशल उद्धार गरिएको थियो ।
दक्षिण कोरियाली राष्ट्रपति मुन जाए इनले राति नै राष्ट्रिय प्रकोप व्यवस्थापन निकायसँग छलफल गरेका थिए ।
उनले उपलब्ध साधन र स्रोतको अधिकतम प्रयोग गरी डढेलो नियन्त्रण गर्न आदेश दिएका छन् ।
तीव्र वेगको हावा र अँध्यारोका कारण अग्निनियन्त्रकलाई डढेलो नियन्त्रणको काममा कठिनाइ उत्पन्न भएको बताइएको छ ।
डढेलो नियन्त्रणका लागि दशभन्दा बढी हेलिकोप्टर आगलागी प्रभावित क्षेत्रमा पठाइएको छ । उद्धार कार्यमा १० हजारभन्दा बढी अग्निनियन्त्रक, सुरक्षाकर्मी र अन्य उद्धारकर्मी परिचालन गरिएको छ ।– सिन्ह्वा
-1732353496.jpg)
