टोखामा कोरोना संक्रमितको संख्या १३०० नाघ्यो
काठमाडौंको टोखा नगरपालिकामा कोरोना सङ्क्रमितको सङ्ख्या एक हजार ३०० नाघेको छ। काठमाडौंको उत्तरी क्षेत्रमा रहेको टोखामा शुक्रबार ६६ सङ्क्रमित थपिएसँगै नगरपालिकाभित्र कुल सङ्ख्या एक हजार ३०१ पुगेको हो। सबैभन्दा थोरै वडा–१ मा २८ र सबैभन्दा धेरै वडा –८ मा १५६ सङ्क्रमित भेटिएका छन्। टोखामा ११ वडा छन्।
यस्तै, वडा–१ मा २८, २ मा ६२, ३ मा १५२, ४ मा ६३, ५ मा १३६, ६ मा १३३, ७ मा १५५, ८ मा १५६, ९ मा ८७, १० मा १०४ र ११ मा ९८ सङ्क्रमित भेटिएका हुन्। यस्तै विभिन्न ठाउँमा बसोबास गरेका र टोखा नगरपालिकामा पीसीआर परीक्षण गरेका १२७ सङ्क्रमित फेला परेका छन्। हालसम्म फेला परेकामध्ये ७३६ पुरुष र ५६५ महिला रहेका छन्।
कोरोना सङ्क्रमितमध्ये ८०७ जना निको भएर घर फर्किसकेका छन् भने ४८९ जना सक्रिय सङ्क्रमित छन्। सक्रिय सङ्क्रमितमध्ये ४११ होम आइसोलेसन र ५६ बिरामीको उपत्यकाका विभिन्न अस्पतालमा उपचार भइरहेको नगरपालिकाका प्रवक्ता बच्चुराज बस्यालले बताए। जसमध्ये २२ जना अहिलेसम्म सम्पर्कविहीन छन्।
टोखामा हालसम्म कोरोना सङ्क्रमणबाट पाँच जनाको मृत्यु भइसकेको छ। मृत्यु भएकामध्ये वडा–४ मा एक, ६ मा एक, ८ मा एक र ९ मा दुईजना छन्।
नगरपालिकाले कोरोना सङ्क्रमित बिरामीको उपचारका लागि टोखा चण्डेश्वरी प्राथमिक स्वास्थ्य केन्द्रमा १७ श्ययाको आइसोलेसन सेन्टर स्थापना गरेर बिरामीको उपचार गराउँदै आएको छ। नगरपालिकामा कोरोना सङ्क्रमितको दर बढेसँगै उक्त आइसोलेसन सेन्टरको समेत स्तरोन्नति गरिने नगरप्रमुख प्रकाश अधिकारीले बताए।
नगरपालिकाभित्रका सबै वडामा टोखाले पीसीआर परीक्षणको दायरालाई समेत बढाएको छ। हालसम्म झण्डै पाँच हजार व्यक्तिको पीसीआर परीक्षण गरिसकेको छ। टोखाले यसअघि नै कोरोना पोजिटिभ देखिएर होम आइसोलेसनमा बसेका बिरामीलाई प्रतिदिन रू. ३५० भत्ता दिने निर्णय गरिसकेको छ।
नगरप्रमुख अधिकारीले नगरपालिकाभित्र कोरोना सङ्क्रमितको सङ्ख्या बढ्दै गए नगरपालिकाभित्र रहेका ग्राण्डी अन्तर्राष्ट्रिय अस्पताल धापासी, ग्रिनसिटी अस्पताल वसुन्धरा, अल नेपाल अस्पताल सामाखुशी र विनायक अस्पताल गोँगबुसँग सहकार्य गरेर बिरामीको उपचार गरिने बताए।
-1732452683.jpg)
-1732353496.jpg)