१५ वर्षीया किशोरी बलात्कारको आरोपमा एकजना पक्राउ
रौतहटमा १५ वर्षीया किशोरी बलात्कारको आरोपमा प्रहरीले एक जनालाई पक्राउ गरेको छ। रौतहटको कटहरिया नगरपालिका १ का इन्दल दासलाई बलात्कारको आरोपमा प्रहरीले सोमवार राति पक्राउ गरेको हो।
पक्राउ परेका दासलाई इलाका प्रहरी कार्यालय गरुडामा राखिएको छ। दासलाई जिल्ला अदालत रौतहट गौरबाट म्याद थप गराई अनुसन्धान शुरु गरिएको इलाका प्रहरी कार्यालय गरुडाका प्रमुख डिएसपी रवि रावलले जानकारी गराए। अदालतले दासलाई नियन्त्रणमा राखी अनुसन्धान गर्न सात दिनको म्याद दिएको डिएसपी रावलले बताए।
सोमवार राति करिब ९ बजेतिर धारामा पानी लिन घरबाहिर गएकी १५ वर्षीया एक किशोरीलाई एकान्तको मौका छोपी दासले मुख थुनेर धानखेतमा लगेर बलात्कार गरेको आरोप लागेको छ। घटनालगत्तै पीडितले घरमा गएर सबै कुरा बताएपछि पीडितका बुबाले प्रहरीलाई खबर गरेका थिए। इलाका प्रहरी कार्यालय कटहरियाबाट गएको टोलीले राति नै दासलाई नियन्त्रणमा लिन सफल भएको थियो।
किशोरीलाई जिल्ला अस्पताल गौरमा स्वास्थ्य परीक्षण गराइएको छ। परीक्षणको रिपोर्ट आएपछि थप कारबाही अगाडि बढाइने प्रहरीको भनाइ छ। प्रहरीले पीडित किशोरीका पिताले दिएको जाहेरीको आधारमा तत्काल कारबाही अगाडि बढाइएको बताएको छ।
यसअघि केही वर्ष पहिले पनि दासले किशोरीलाई जबरजस्ती करणी गर्ने प्रयास गरेको बुझिएको छ।
-1732180391.jpg)
-1732099242.jpg)