पाल्पामा पहिरोले घर पुर्दा एकै परिवारका पाँच जना बेपत्ता
पाल्पाको रम्भा गाउँपालिका वडा नं. २ फोक्सिङस्थित बेलौजा भन्ने ठाउँमा पहिरोले दुई घर पुर्दा पाँच जना बेपत्ता भएका छन्। बेपत्ता हुने सबै एउटै परिवारका हुन्।
रम्भास्थित प्रहरी चौकी हुगीका प्रहरी सहायक निरीक्षक कन्हैया चौधरीले पुरिएका दुईमध्ये एउटा घरका सबै सकुशल भएको जानकारी आएको बताए। अहिले पनि पहिरो आउने क्रम जारी रहेको उनको भनाइ छ।
बेलौजास्थित स्वास्थ्यचौकी माथिबाट खसेको पहिरोले हुमबहादुर गाहा र मनबहादुर गाहाको घर पुरिएको स्थानीय सञ्चारमाध्यम माइपोखरी न्यूजले जनाएको छ। बेपत्ता हुने पाँचै जना हुमबहादुर गाहाका परिवारका सदस्य हुन्। मनबहादुरका परिवारका तीन जनाले भने भागेर ज्यान जोगाएका छन्।
अहिले प्रहरी घटनास्थलतर्फ गइरहेको छ। पानी परिरहेको र बाटो अप्ठ्यारो भएकाले घटनास्थल पुग्न अझै एक घन्टा लाग्ने प्रहरी सहायक निरीक्षक चौधरीले बताए।
-1732535850.jpg)
-1732452683.jpg)
