अमेरिकाले दुई दिनभित्र टिकटक र वीच्याट एप डाउनलोड गर्न प्रतिबन्ध लगाउने
अमेरिकाले दुई दिनभित्र चिनियाँ एप टिकटक र वीच्याट डाउनलोडमा प्रतिबन्ध लगाउने भएको छ।
अमेरिकाको वाणिज्य विभागले दुई दिनभित्र दुवैलाई यूएस एप स्टोरबाट हटाउने जनाएको छ। त्यसपछि कोही पनि अमेरिकी नागरिकले यी एप डाउनलोड गर्न सक्ने छैनन्।
च्याटिङ, भिडिओ शेयरिङ र मोबाइल भुक्तानी जस्ता काममा प्रयोग हुने वीच्याट आइतबारदेखि अमेरिकामा आधिकारिक रुपमा नै बन्द हुनेछ। छोटो भिडिओको प्लेटफर्मका लागि प्रयोग हुने टिकटकको प्रयोग भने १२ नोभेम्बरसम्म गर्न सकिने छ। त्यसपछि टिकटकमाथि पनि पूर्ण प्रतिबन्ध लाग्नेछ।
राष्ट्रपति डोनाल्ड ट्रम्प कुनै सम्झौताका लागि सहमत भए मात्र यो प्रतिबन्ध रोकिने छ। अमेरिकी कम्पनी ओरैकल र टिकटकको स्वामित्व भएको बाइट डान्स कम्पनीबीच सम्झौता भएर ट्रम्प प्रशासनले त्यसलाई स्वीकृति दिए यो प्रतिबन्ध रोकिने जनाइएको छ।
ट्रम्प प्रशासनले चिनियाँ एप राष्ट्रिय सुरक्षाका लागि खतरा बन्न सक्ने जनाउँदै आएको छ। यी कम्पनीले अमेरिकी प्रयोगकर्ताका निजी सूचना चीनलाई दिएको पनि ट्रम्प प्रशासनको आशंका छ। तर, चीन र दुवै कम्पनीले यो आरोपलाई अस्वीकार गरिसकेका छन्।
अमेरिकाको वाणिज्य विभागको निर्णयबाट निराश भएको र यसमा सहमत हुन नसकिने टिकटकले जनाएको छ। ट्रम्प प्रशासनको चिन्ताको मध्यनजर गर्दै कम्पनीले अतिरिक्त पारदर्शिताका लागि प्रतिबद्धता जनाइसकेको टिकटकले जनाएको छ।
टिकटकले भनेको छ, “हामी अन्यायपूर्ण आदेशको चुनौती दिइरहनेछौँ। यो आदेश सही प्रक्रिया पालन नगरी जारी गरिएको छ। यसले साना कारोबारको भविष्य संकटमा पारेको छ।” अमेरिकी नागरिकका लागि आफ्नो आवाज उठाउने र रोजीरोटीको दुवैको साधनको रुपमा प्रयोग भइरहेको पनि टिकटकले जनाएको छ।
वीच्याटको स्वामित्व भएको टेन्सेन्ट कम्पनीले यो प्रतिबन्धलाई दुर्भाग्यपूर्ण भएको बताएको छ। कम्पनीले अमेरिकी सरकारसँग समस्याको दीर्घकालीन समाधानका लागि छलफल पनि जारी राख्ने जनाएको छ।
-बीबीसीबाट
-1732180391.jpg)
