नेपालमा फेरि रेल सञ्चालनमा आउँदै, यस्तो छ रेलको स्वरूप

जयनगर–जनकपुर ३४ किमी खण्डमा सञ्चालन हुने रेल आज जनकपुर आउँदैछ। नेपाल सरकारले चेन्नईको कोंकर्ण रेल्वे कर्पोरेसनसँग किनेको दुई वटा रेल नेपाल ल्याउन लागिएको हो।

शुक्रबार यो रेलको परीक्षण गरिने कार्यक्रम छ। दशैंअगाडि नै नियमित रुपमा सञ्चालनका लागि भारतसँग छलफल गरी मोडालिटी तय गर्ने नेपाल रेल्वे कम्पनीले जनाएको छ।

भारत सरकारको सहयोगको ६९ किमी लामो जयनगर–जनकपुर–बर्दिबास रेलमार्गको पहिलो खण्ड जयनगर–जनकपुरमा रेल सञ्चालन गरिन लागेको हो। सन् २०१० मा भारत सरकारले यो रेलमार्गको 'ब्रोडगेज' पूर्वाधार निर्माणमा सहयोग गर्ने प्रतिवद्दता जनाएको थियो। जनकपुरदेखि महोत्तरीको बिजलपुरासम्मको खण्डमा भने पूर्वाधार निर्माण भइरहेको छ।

राणा शासनका बेला बिसं १९८४ मै भारतको जयनगरदेखि बिजलपुरासम्म रेल सेवा सञ्चालन गरिएको थियो। शुरुआतमा तत्कालीन ब्रिटिश शासकले नेपालका जंगलको काठ ओसार्ने ध्येयले रेल सेवा शुरु गरेको मानिन्छ। कालान्तरमा यो सीमावर्ती क्षेत्रका नागरिकको आवतजावतको प्रमुख साधन बनेको थियो।

यद्यपि, पूरानो प्रविधिको यो रेलको इन्जिन, लिक पूरानो हुँदै गएर यो रेलमार्ग जयनगरदेखि जनकपुरसम्म मात्र खुम्चिएको थियो । पछिल्लो दशकदेखि त यो खण्डसमेत बन्द भएको थियो।

तस्वीर स्रोत : रेल विभागका प्रमुख बलराम मिश्रको फेसबुक पेज ।