सिन्धुपाल्चोकमा पहिरोबाट दुई महीनामै ७४ जनाको मृत्यु, अझै ४१ बेपत्ता
निरन्तर प्राकृतिक विपत्ति खेप्दै आएको सिन्धुपाल्चोकमा बाढीपहिरोले यो वर्ष धनजनको ठूलो क्षति भएको छ। दुई महिनायता मात्रै ७४ जनाले ज्यान गुमाएका छन्। अझै ४१ जना बेपत्ता छन् ।
गएको आइतबार बाह्रबिसे नगरपालिका–७ मा गएको पहिरोमा १४ जनाको मृत्यु भएको छ। १७ जना अझै बेपत्ता छन्। गएको ३० साउनमा सिङ्गो गाउँ नै पुरिने गरी गएको लिदी पहिरोमा परी ३६ जनाले ज्यान गुमाए। सो पहिरोमा परी दुई जना अझै हराइरहेका छन्।
त्यस्तै गएको १९ साउनमा मेलम्ची नगरपालिका–११ को कभर्डहल निर्माण गर्ने कामदार सुतेको टहरो नै पुर्दा नौ जनाले ज्यान गुमाए। मेलम्ची खानेपानीको गेट फुट्दा खोलाको बेगले दुई जनालाई बगाएको थियो।
तीमध्ये एक जना हालसम्म पनि हराइरेहका छन्। एक जनाको तत्काल उद्धार गरिएको थियो। सोही दिन पाँचपोखरी थाङ्पाल गाउँपालिका–२ बरुवामा पहिरोमा परी एक दम्पतीले ज्यान गुमाएका थिए। १ साउनमा भोटेकोशी गाउँपालिका–४ फूल्पिङमा पहिरोमा पाँच जना पुरिएका थिए। लामो प्रयासपछि मात्र उनीहरुको शव फेला परेको थियो ।
यस्तै २४ असारमा गएको पहिरोले बाह्रबिसे नगरपालिकामा ठूलो क्षति पुर्यायो । बाह्रबिसे नगरपालिका–५ जम्बुमा बजार नै बगाउने गरी गएको पहिरोले दुई जनाको मृत्यु भयो भने १७ जना अझै हराइरहेका छन्। सोही दिन भोटेकोशी गाउँपालिका–४ बुलकुटेमा एक जनाको बाढीले बगाएर ज्यान गयो।
२२ असारमा चौतारा साँगाचोकगढी नगरपालिका वडा नं. १२ र ९ मा गएको पहिरोले दुई जनालाई बगाएको थियो। एक जना अहिलेसम्म बेपत्ता छन्।
पहिरोमा परी जिल्लाभर अहिलेसम्म १३० घर पूर्णरूपमा क्षति भएको प्रमुख जिल्ला अधिकारी उमेशकुमार ढकालले जानकारी दिए। पहिरोका कारण जोखिममिा परेका बाह्रबिसे नगरपालिकाका एक हजार ४४१ घरधुरीलाई स्थानान्तरण गर्नुपर्ने अवस्था रहेको उनले बताए।
यस्तै भोटेकोशीमा ८७५, जुगल गाउँपालिकामा ४०८, मेलम्ची नगरपालिकामा १४३, पाँचपोखरी थाङ्पाल गाउँपालिकामा ६६ घरधुरीलाई सार्नुपर्नेछ। ढकालका अनुसार हेलम्बुमा ६७, चौतारा साँगाचोकगढी नगरपालिकामा २८, सुनकोशी गाउँपालिकामा ८४, लिसङ्खुपाखर गाउँपालिकामा ४८, बलेफी गाउँपालिकामा ७४ र त्रिपुरासुन्दरी गाउँपालिकामा १७ घर पनि स्थानान्तरण गर्नुपर्ने छ।
-1732261651.jpg)
-1732259528.jpg)
-1732180391.jpg)
