ढोरपाटन बाढी-पहिरो: शव भेटिएका १४ मध्ये चार जनाको सनाखत, बेपत्ता २४ जनाको खोजी जारी
बुधबार रातिको बाढी र पहिरोले बागलुङको ढोरपाटन नगरपालिका–९ बोबाङमा मृत्यु भएका १४ मध्ये चार जनाको शव सनाखत भएको छ। सनाखत हुनेमा ढोरपाटन–९ की २६ वर्षकी केशमाया विक, ४५ वर्षीय वीरे विक, २२ वर्षीय जीवन विक र ११ वर्षीय डल्ले विक रहेको प्रहरीले जनाएको छ।
शव भेटिएका १० जनाको अझै सनाखत हुन नसकेको प्रहरी नायव उपरीक्षक राजेन्द्र रेग्मीले बताए। उद्धारमा खटिएका प्रहरी निरीक्षक प्रकाशसिंह भण्डारीका अनुसार, कतिपय शव क्षतविक्षत अवस्थामा भेटिएकाले पहिचान गर्न नसकिएको हो।
उनीहरुको शव बुर्तिबाङस्थित प्राथमिक स्वास्थ्य केन्द्रमा राखिएको छ। पहिचान भएकाहरुको पोष्टमार्टमको काम आज हुनेछ।
पहिरोमा परी २४ जना बेपत्ता छन्। उनीहरुको आज बिहानैदेखि खोजी शुरु भएको प्रहरी नायव उपरीक्षक रेग्मीले बताए।
रातको समयमा खसेको पहिरोमा परी धेरैले ज्यान बचाउन नसकेका हुन्। केही मानिसले भागेर ज्यान बचाएका थिए भने कतिलाई भाग्ने क्रममै खोलाले बगाएको थियो। बगाएकामध्ये केहीको अधिकारीचौर, बुर्तिवाङ र बडिगाड गाउँपालिकासम्म शव भेटिएका छन्।
पहिरोले फलेघर र सुपुर्दुङका दजर्न बढी घर बगाएको छ भने वडा नम्बर ८ सम्म आइपुग्दा ४० घर बगेका छन्। बस्ती भएको स्थानमा अहिले खोला बगेको छ।
ढोरपाटन जाने सडकको देउरालीबाट खसेको पहिरोले भुजीखोला थुनिएर ताल बनेको र त्यसपछि बाढी चल्दा ठूलो क्षति पुगेको स्थानीयले बताएका छन्।
-1732535850.jpg)
-1732452683.jpg)
