स्वास्थ्यकर्मी नै संक्रमित भएपछि अब कोरोना परीक्षण गरेर मात्रै क्यान्सरको उपचार
कोरोनाभाइरस संक्रमणको जोखिम उच्च बन्दै गएपछि चितवनको भरतपुरस्थित बीपी कोइराला मेमोरियल क्यान्सर अस्पतालले पीसीआर परीक्षणपछि मात्रै क्यान्सरको उपचार थाल्ने भएको छ।
देशका विभिन्न जिल्लाबाट क्यान्सरका बिरामी उपचारका लागि आउने हुँदा सङ्क्रमण फैलन नदिन अस्पतालले सबै बिरामीको पीसीआर परीक्षण अनिवार्य गरेको छ। क्यान्सरका बिरामीको उपचारका क्रममा अन्य रोगसँग लड्ने क्षमता कमजोर हुने भएकाले कोरोना परीक्षणपछि मात्र उपचार गरिने अस्पतालले जनाएको छ।
बीपी कोइराला मेमोरियल क्यान्सर अस्पतालका ४२ स्वास्थ्यकर्मी र कर्मचारीलाई संक्रमण भएको पुष्टि भएको छ। तीमध्ये सात जना निको भइसकेका छन्।
अस्पतालका कार्यकारी निर्देशक डा. देजकुमार गौतमले कोरोना सङ्क्रमितलाई अन्य बिरामीसँग राखेर उपचार गरेको खण्डमा अन्य बिरामी र कर्मचारीलाई सर्ने र अवस्था भयावह हुनसक्ने बताए। कोरोनाको उपचार दुई हप्तामा निको हुनसक्ने अवस्थामा निको भइसकेपछि मात्र क्यान्सरको उपचार शुरु गर्दा फरक नपर्ने गौतमको भनाइ छ।
“क्यान्सरका बिरामीलाई कोरोना सङ्क्रमितसँग उपचार गर्दा मृत्युदरमा २५ देखि ३५ प्रतिशतसम्म बढ्ने खतरा हुन्छ, त्यसकारण पनि क्यान्सर उपचारपूर्व कोरोनाको परीक्षण अनिवार्य गराउनुपर्छ”, उनले भने। कोरोना प्रमाणित भएका बिरामीलाई निको भइसकेपछि मात्रै उपचार गरिने गौतमले बताए।
अस्पतालले कोरोनाको सङ्क्रमणबाट जोगाउन एक बिरामी एक कुरुवाको नियम अनिवार्य गरेको छ। अस्पतालका आकस्मिक र बहिरङ्ग सेवा नियमित सञ्चालन भइरहेको निर्देशक गौतमले जानकारी दिए। उनले पीसीआर परीक्षण ल्याब केही दिनभित्र अस्पतालमै सञ्चालनमा ल्याइने तयारी भइरहेको बताए।
सामान्य अवस्थामा दैनिक ७०० देखि ८०० बिरामीले उपचार गर्ने क्यान्सर अस्पतालमा अहिले एक चौथाइ बिरामी मात्र उपचारका लागि आउने गरेको अस्पतालले जनाएको छ।
-1732353496.jpg)
