सन्दीपले दुई विकेट लिएको खेलमा तालावाहजको जित
क्यारेबियन प्रिमियर लिग (सीपीएल) अन्तर्गत सन्दीप लामिछाने आबद्ध जमैका तालावाहजले छैटौँ खेलमा जित हात पारेको छ। शनिबार राति भएको खेलमा सेन्ट किट्स एण्ड नेभिस प्याट्रियोट्सलाई ३७ रनले पराजित गर्दा सन्दीपले दुई विकेट लिए।
तालाहावजका लागि सन्दीप र फिडेल एड्वार्डसले दुई दुई तथा कार्लोस ब्रेथवेटले तीन विकेट लिएपछि १४८ रनको लक्ष पछ्याएको प्याट्रियोट्स ११० रनमा नै खुम्चियो। सन्दीपले एभिन लेविस र इमरान खानको विकेट लिएका थिए। चार ओभर बलिङ गरेका उनले २७ रन दिए।
यसअघि टस जितेर तालावाहजले पहिला ब्याटिङ गर्दै निर्धारित २० ओभरमा छ विकेट गुमाएर १४७ रन बनाएको थियो। उसका लागि ग्लेन फिलिप्सले अविवित ७९ रन बनाए।
तालावाहज जितसँगै अङ्क तालिकाको तेस्रो स्थानमा उक्लेको छ। तालावाहज ६ खेलमध्ये तीनमा जित र तीनमा हार बेहोरेको छ।
छ वटै खेल खेलेका सन्दीपले नौ विकेट लिएका छन्। उनी कुनैपनि खेलमा विकेटविहीन हुनुपरेको छैन।
-1732261651.jpg)
-1732259528.jpg)