ओली-दाहाल छलफल सकियो, शनिबारलाई डाकियो नेकपा सचिवालय बैठक
प्रधानमन्त्री एवं सत्तारुढ नेपाल कम्युनिष्ट पार्टी (नेकपा) का अध्यक्ष केपी शर्मा ओली र अर्का अध्यक्ष पुष्पकमल दाहालबीचको छलफल सकिएको छ।
बालुवाटारस्थित प्रधानमन्त्री निवासमा नेकपाका अध्यक्षद्वयबीच करीब दुई घण्टा छलफल भएको थियो।
नेकपाभित्रको विवाद समाधानका लागि सुझाव दिन गठित कार्यदलले बुझाएको प्रतिवेदनमाथि छलफलका लागि ओली र दाहालको मंगलबारको भेट तय भएको थियो।
छलफलमा दुवै अध्यक्षबीच आउँदो शनिबार, १३ भदौमा केन्द्रीय सचिवालयको बैठक बोलाउने सहमति भएको प्रधानमन्त्री ओलीका प्रेस सल्लाहकार एवं नेकपा प्रचार विभाग उपप्रमुख सूर्य थापाले जानकारी दिए।
थापाका अनुसार, नेकपाभित्रको विवाद समाधानका लागि सुझाव दिन गठित कार्यदलले बुझाएको प्रतिवेदन बैठकको प्रमुख अजेण्डा हुनेछ।
नेकपामा मध्य असारदेखि तीव्र बनेको शक्ति संघर्षले पार्टीलाई नै फुटको संघारमा पुर्याएको थियो। संघर्ष चर्कंदा ओलीले प्रधानमन्त्री र पार्टी अध्यक्ष दुवै पद छाड्नुपर्ने दबाब बढेको थियो।
शक्ति संघर्ष मत्थर पार्न अनेक चरणमा भएका भेट र छलफलपछि अध्यक्षद्वय ओली र दाहाल कार्यदल गठन गर्न सहमत भएका थिए। ओली, दाहाल र वरिष्ठ नेता माधवकुमार नेपाल समूहका दुई-दुई जना सहभागी कार्यदलले शनिबार, ६ भदौमा अध्यक्षद्वयलाई प्रतिवेदन बुझाएको थियो।
-1732261651.jpg)
-1732259528.jpg)