काठमाडौं उपत्यकामा अत्यावश्यक बाहेकका सबै सेवा १५ भदौसम्म बन्द गर्ने स्थानीय सरकारहरुको निर्णय
उपत्यका नगरपालिका मेयर फोरमले स्थानीय तहले दिने अत्यावश्यक बाहेकका सबै सेवा १५ भदौसम्म बन्द गर्ने निर्णय गरेको छ। उपत्यका मेयर फोरमको सोमबार बसेको बैठकले काठमाडौं उपत्यकामा कोभिड १९ संक्रमणको अवस्था अझैं कम नभएकाले अत्यावश्यक बाहेकका सबै सेवा बन्द गर्ने यस अघिको निर्णयलाई १५ भदौसम्म निरन्तरता दिने निर्णय गरेको हो।
यसअघि २६ साउनमा बसेको बैठकले ९ भदौसम्म अत्यावश्यक बाहेकका सबै सेवा बन्द गर्ने निर्णय गरेको थियो। बैठकका निर्णयहरू सुनाउँदै मध्यपुर थिमि नगरपालिकाका मेयर मदनसुन्दर श्रेष्ठले उपत्यकाभित्र संक्रमणको दर अझैं पनि कम नभएकाले अत्यावश्यक बाहेकका सबै सेवा १५ भदौसम्म बन्द गर्ने निर्णय भएको बताए।
बैठकले निषेधाज्ञाको स्थितिलाई पनि १५ भदौसम्म कायम गर्न उपत्यकाका तीनवटै जिल्ला प्रशासन कार्यालयलाई सुझाव दिने निर्णय समेत गरेको छ। यसबाहेक कोभिड १९ संक्रमित व्यक्तिको कन्टयाक्ट ट्रेसिङमा परेका सबै मानिसको पीसीआर परीक्षण स्वास्थ्य मन्त्रालय अन्तर्गतको ‘केस इन्भेष्टिगेसन एण्ड कन्टयाक्ट ट्रेसिङ’ (सिआइसीटी) सँगको सहकार्यमा सम्पन्न गर्ने निर्णय पनि गरेको छ।
काठमाडौं महानगरपालिकाका प्रमुख विद्यासुन्दर शाक्यले उपत्यकाभित्र संक्रमित व्यक्तिको सम्पर्कमा आएका सबै मानिसहरूको पीसीआर परीक्षण गर्न आवस्यक रहेको बताए।
अहिले संक्रमित व्यक्तिको सम्पर्कमा आएका व्यक्तिहरूको पीसीआर परीक्षण नभएकाले स्वास्थ्य मन्त्रालयको टिमसँग समन्वय गरी क्लोज कन्ट्याक्टमा रहेका सबै मानिसहरूको एकपटक परीक्षण गर्ने निर्णय गरिएको बताए।
निषेधाज्ञाको अवस्थामा उपत्यका बाहिरबाट कोहीपनि नआएकाले संक्रमितको सम्पर्कमा रहेका सबैको परीक्षण गर्दा संक्रमणको अवस्थालाई नियन्त्रणमा लिन सकिने शाक्यले बताए।
काठमाडौं उपत्यकामा अहिले संक्रमणको दर बढ्दै गएको छ। त्यसैले उपत्यकाका तीनवटै जिल्ला प्रशासन कार्यालयले ४ भदौदेखि लागू हुनेगरी एक साताका लागि निषेधाज्ञा जारी गरेका छन्। तरपनि उपत्यकामा संक्रमणको दर घट्न सकेको छैन।
त्यसैले पनि फोरमले निषेधाज्ञालाई केही समय थप गर्न सुझाव दिदै पीसीआर परीक्षणलाई बढाएर संक्रमणको स्थितिलाई नियन्त्रणमा लिने योजना बनाएको हो।
-1732353496.jpg)
