कैलालीको सहजपुरमा पहिरो खस्दा भीमदत्त राजमार्ग अवरुद्ध
कैलालीको चुरे गाउँपालिका–३ सहजपुरमा पहिरो खस्दा भीमदत्त राजमार्ग अवरुद्ध भएको छ। बुधबार मध्यान्ह १२ बजेतिर पहिरो खसेर राजमार्ग अवरुद्ध भएको हो।
सुदूरपश्चिम प्रदेशको पहाडी सात जिल्लाका लागि एउटै मार्गको रुपमा रहेको सो राजमार्ग अवरुद्ध भएपछि धेरै यात्रु बाटोमा अलपत्र परेका छन्।
पहिरोले बाटो अवरुद्ध हुँदा कम्तीमा डेढ सय गाडीको बाटोमा लाम लागेको चुरे गाउँपालिकाका अध्यक्ष धनबहादुर रोकामगरले जानकारी दिए। पहिरो खसेर सात वटै पहाडी जिल्लामा जान र उताबाट यता आउने बाटो ठप्प भएको छ।
उनले माथिबाट ढुंगाको चट्टान खसेर बाटो अवरुद्ध भएको बताए। बाटो खोलाउन जेसिवि लगाउदा ठूलो पहिरो जाने जोखिम देखिएकोले बाटो खोल्न नसेकोको अध्यक्ष रोकामगरले बताए।
उनका अनुसार राजमार्गमाथि करिब २५ मिटरसम्म पहिरो थुप्रिएको छ। यसैगरी, माथिबाट खसेको ढुङ्गाले सडकसमेत भत्काएको छ।
-1732353496.jpg)
