सिन्धुपाल्चोकस्थित लिदीको बस्ती स्थानान्तरण गर्ने गृहमन्त्रीको आश्वासन
गृहमन्त्री रामबहादुर थापाले सिन्धुपाल्चोकको जुगल गाउँपालिकास्थित लिदीको बस्ती स्थानान्तरण गरी उचित स्थानमा बसोबासको व्यवस्था मिलाइने बताएका छन्।
पहिराग्रस्त क्षेत्रमा शुक्रबार पुगेर स्थलगत अनुगमन गरेपछि उनले बस्ती स्थानान्तरण गरिने बताएका हुन्। शुक्रबार बिहान खसेको पहिरामा परेर त्यहाँ ११ जनाको मृत्यु भएको छ भने २७ बेपत्ता छन्।
मन्त्री थापाले अझै ठूलो क्षति हुन सक्ने अवस्था देखिए पनि पूर्वसावधानी अपनाउँदा कम क्षति भएको दाबी गरे। सरकारका तर्फबाट उद्धारलाई छिटोभन्दा छिटो अघि बढाउने र पुनःनिर्माणको काम तीव्र बनाइने गृहमन्त्रीको भनाइ छ।
शुक्रबार गृहमन्त्री थापा राहत सामग्रीसहित घटनास्थल पुगेका थिए। उनले लिदी गाउँ जोखिमयुक्त ठाउँमा रहेको निष्कर्षका आधारमा स्थानीय प्रशासनले सचेतना अपनाउन आग्रह गरे पनि क्षति भएको भन्दै दुःख व्यक्त गरे।
मन्त्री थापाले भने, “उहाँहरु साँझ सरेर अर्कै ठाउँमा बास बसे पनि बिहान घरमा फर्किएको समयमा पहिरो आएकोले क्षति हुन पुग्यो।” उद्धार सकिएपछि बस्ती स्थानान्तरण गरी पीडितका लागि उपयुुक्त स्थानमा बासस्थानको व्यवस्था मिलाउन प्रक्रिया शुरु गरिने उनले आश्वासन दिए।
त्यहाँ ४० परिवारका लागि पुग्ने राहत सामग्री पु¥याइएको छ। गृह मन्त्रालयका अनुसार ४० थान चाइनिज पाल, ४० वटा त्रिपाल सेट, ४० सेट भाँडावर्तन, ४० वटा ब्ल्यांकेट, ४० म्याट्रेस, ४० बाल्टिन, ४० जग, ५० प्लाष्टिकको ग्यालिन र ६० थान पञ्जा लगिएको हो। मन्त्री थापाले तत्कालीन राहत सामग्रीका लागि सरकारका तर्फबाट रु.२ लाख पनि हस्तान्तरण गरे।
-1732261651.jpg)
-1732259528.jpg)
-1732180391.jpg)